Policia e Kosovës shpall në kërkim tre persona për ngjarjen e rëndë në Gjilan.
Policia e Kosovës ka shpallur në kërkim Mefail Shkodra, Edonis Shkodra dhe Engjull Shkodra, në kuadër të hetimeve për ngjarjen e rëndë me armë zjarri që ndodhi më 10 gusht 2025 në rrugën “Ibrahim Rugova” në Gjilan, ku dy persona babë e bir humbën jetën dhe dy të tjerë u plagosën.
Sipas njoftimit zyrtar, Drejtoria Rajonale e Policisë në Gjilan, me autorizim të Prokurorisë Themelore në Gjilan, kërkon bashkëpunimin e qytetarëve dhe mediave për lokalizimin dhe arrestimin e të dyshuarve.
Policia bën thirrje që kushdo që ka informacion për vendndodhjen e tyre të kontaktojë menjëherë stacionin më të afërt policor ose të përdorë aplikacionin digjital “Lajmëro Policinë”, adresën e emailit info@kosovopolice.com, si dhe numrat kujdestarë 038 504 504 7299 dhe 038 504 504 7201.
Autoritetet garantojnë se të gjitha të dhënat e ofruara do të ruhen me konfidencialitet të plotë. a.b
