Gjyqtari i Gjykatës së Posaçme kundër Korrupsionit dhe Krimit të Organizuar (GJKKO), Erjon Çela, ka rrëzuar kërkesën e paraqitur nga avokatët e Sali Berishës dhe dhëndrit të tij, Jamarbër Malltezi, për përjashtimin e trupës gjykuese që po shqyrton çështjen “Partizani”.
Trupa gjykuese e përbërë nga gjyqtarët Elsa Ulliri, Bib Ndreca dhe Rudina Palloj u konsiderua nga mbrojtja si e papërshtatshme për të gjykuar këtë çështje. Sipas pretendimeve të të pandehurve, këta gjyqtarë nuk garantojnë paanshmëri dhe pavarësi, për shkak se janë nën mbikëqyrjen, përgjimin dhe monitorimin e Prokurorisë së Posaçme (SPAK), e cila është palë në këtë proces.
Më herët, gjyqtarja Elsa Ulliri kishte kërkuar dorëheqjen nga çështja, duke u justifikuar me lidhje familjare me deputeten e Partisë Demokratike, Andia Ulliri. Por kjo kërkesë u refuzua nga zëvendëskryetari i GJKKO, duke i hapur rrugën vijimit të procesit me të njëjtën trupë gjykuese.
Seanca e radhës për dosjen “Partizani” është planifikuar të mbahet më 15 shtator.
Në këtë çështje, Sali Berisha akuzohet për “korrupsion pasiv i funksionarëve të lartë publikë, kryer në bashkëpunim”, ndërsa Jamarbër Malltezi për “korrupsion aktiv” dhe “pastrim parash”. Të pandehur janë shpallur gjithashtu Fatmir Bektashi, Xhimi Begeja dhe Andia Pustina. a.b
