Partia Mundësia ka siguruar përfundimisht mandatin e dytë në Tiranë pas një ndeshje 6 ditore numrash mes saj dhe PD që priste mandatin e 14.
Përmes një postimi në Facebook, Agron Shehaj, ka ndarë një foto me ekipin e tij, ndërsa shkruan se “e pamundura ndodhi”.
“Kemi thyer një mur që dukej i pakalueshëm. Por puna e vërtetë fillon tani. Ne do të jemi aty, me zë, me fakte, me qëndresë. Për çdo qytetar që na dha votën. Për çdo shqiptar që pret më shumë”, tha ai teksa falenderoi të gjithë për kontributin dhe mbështetjen.
Nuk ka më kohë për të qëndruar spektatorë apo për të pritur një shpëtimtar. Ejani! Bashkohuni me ne! Me mbështetjen tuaj, çdo gjë është e mundur.
Partia Mundësia është opozita e shekullit 21. E ndershme. E vërtetë. Moderne. E vendosur.
Një opozitë që sheh nga e ardhmja, një e ardhme që na përfshin të gjithëve.
Faleminderit nga zemra çdo votuesi, vëzhguesi, koordinatori, kandidati, kandidati nga diaspora, ambasadorëve të Partisë Mundësia, pjesëmarrësve në takime dhe të gjithë atyre që na kanë mbështetur, haptazi apo në heshtje”, shkruan Shehaj.
Ndërsa deputeti i dytë Erald Kapri falenderon të gjithë ata që mbrojtën vptën e ‘Mundësisë’.
“Ky mandat nuk është i imi, është i të gjithë atyre që besuan te MUNDËSIA, te vota që nuk shkon dëm, te vota që sjell ndryshim.
Ky është mandati i çdo qytetari që beson se politika mund të bëhet ndryshe.
E mbrojtëm çdo votë, siç ju premtuam, deri në fund.
Do jem zëri juaj, vendosmëria juaj dhe shpresa juaj në Kuvend, modeli ndryshe që keni kërkuar në politikë.
Rrugëtimi sapo ka nisur.
Me përgjegjësi, me përulësi, me besim.
Faleminderit Agron, Barbara, Anxhela, Dori, Klodi, Albi, Anxhelo, Fatmir, Gjergj, Bled, Blerim, Xhon, Nok, Elisa, Ardi, Xio, Gimi, Irdi, Redina, Suela, Arbër e qindra aktivistëve tanë që nuk lanë asnjë votë pa numëruar”, ka shkruar Kapri.
