56-vjeçari Bujar Nasufi u ekzekutua mbrëmjen e djeshme në zonën e Pallatit me Shigjeta në Tiranë, teksa po i afrohej banesës së tij. Policia ka fokusuar hetimet në pistën e konflikteve familjare për pronat, duke përfshirë mosmarrëveshjet e mundshme mes viktimës dhe anëtarëve të tjerë të fisit.
Sipas burimeve, autori i krimit ishte në pritje pranë banesës së Nasufit dhe e qëlloi atë me armë zjarri në momentin që 56-vjeçari po parkonte automjetin. Në vendngjarje ka qenë e pranishme edhe bashkëshortja e viktimës, e cila ndodhej brenda mjetit dhe dëshmoi ekzekutimin.
Pamjet e disa kamerave të sigurisë, të sekuestruara nga hetuesit, tregojnë autorin e maskuar me kapuç, që largohet nga vendngjarja me një motor. Raportohet se në kohën e atentatit, dy automjete po afroheshin njëkohësisht në banesë: ajo e viktimës dhe një tjetër që i përkiste vëllait të tij. Të dyja familjet jetojnë në një pallat që ata vetë e kanë ndërtuar disa vite më parë.
Në vendngjarje janë gjetur 6 gëzhoja, të cilat besohet se i përkasin armës me të cilën është vrarë Nasufi.
Autori, që dyshohet se ka qenë vetëm një, ka qenë i maskuar me një kapuç dhe është larguar me motor drejt zonës së Selitës. 56-vjeçari ka humbur jetën në vend, pasi nuk u ka mbijetuar plagëve të marra në pjesën e sipërme të trupit.
Sipas informacioneve paraprake dhënë mbrëmë nga policia e Tiranës, mësohet se viktima ka një mobilieri së bashku me vëllain e tij, ndërsa mësohet se nuk ka asnjë precedent penal.
Policia po vijon hetimet për të identifikuar autorin dhe për të verifikuar lidhjet e mundshme të konfliktit për pronat me këtë ngjarje tragjike. Situata ka tronditur zonën, ndërsa banorët kanë shprehur shqetësim për ngjarjet e fundit kriminale në Tiranë.
