Biznesmeni i burgosur Ilir Rrapaj është paraqitur në Kuvend për të raportuar në Komisionin Hetimor për Shërbimet Publike të Sterilizimit dhe të Check-up në Shëndetësi në lidhje me dosjen e koncensionit të “Sterilizimit”, të cilin e fitoi me kompaninë Saniservis.
Biznesmeni, i arrestuar që në Gusht të 2023 është nën hetim nga Prokuroria e Posaçme për mashtrim me pasoja të rënda. 40% të aksioneve të kompanisë Saniservis dhe 2 shoqëri të tjera tregtare nën administrimin e Ilir Rrapajt, njëra prej tyre në Kosovë, u sekuestruan nga gjykata me kërkesë të SPAK mes tyre edhe dy llogari bankare me vlera mbi 285 mijë Euro dhe 113 mijë Lekë. Në sekuestro u vunë edhe 13 makina dhe një apartament në Vlorë.
SPAK thotë se nga hetimet e kryera ka rezultuar se Ilir Rrapaj, nën administrimin e Saniservis fitoi në kushte të konfliktit të interesit, koncensionin e “Sterilizimit” të mjeteve mjekësore në 2015 për shkak të lidhjeve miqësore mes Rrapajt dhe ish-zëvendësministrit të Shëndetësisë në atë kohë, Klodian Rjepaj, i arrestuar si dhe udhëtime dhe kontakte me ish-ministrin e Shëndetësisë, Ilir Beqaj, i arrestuar për shpërdorim të fondeve të SASPAC dhe nën hetim për sterilizimin. a.b
