Kandidati i Shtëpisë së Lirisë Elton Bano dhe ish-kryeministri Sali Berisha zhvilluan në sheshin kryesor të qytetit mitingun përmbyllës për zgjedhjet e pjesshme të 6 marsit në Bashkinë e Lushnjes.
Ish-kryeministri falënderoi të gjithë të pranishmit në këtë takim entuziast dhe i garantoi se në 6 mars Bashkia e Lushnjes do ti kthehet qytetarëve dhe halleve të tyre.
‘Elton Bano do të jetë një shërbëtor i vërtetë i përkushtuar i juaji, i fëmijëve tuaj, se me punën e tij plotë përkushtim, ai do të bëjë realitet ëndrën tuaj të fisnike të ndryshimit të Lushnjes’, u shpreh Berisha.
“Me votën tuaj në 6 mars, ju votoni jo vetëm për qytetarin e parë të shkëlqyer të Lushnjes, por ju votoni për çdo shqiptar që kërkon ndryshimin jetik për Shqipërinë dhe shqiptarët.
Me votën tuaj më 6 mars, ju votoni që shtëpia juaj e parë, shtëpia e parë e Lushnjes të jetë shtëpia e qytetarëve, shtëpia e njerëzve të ndershëm, shtëpi transparent, shtëpia që përdor taksat tuaja për ti kthyer ato në shërbime ndaj jush, në infrastrukturë ndaj jush, për të ndihmuar biznesin, fermerët dhe mbarë qytetarët e Lushnjes”, tha Berisha.
Berisha ka denoncuar vendimin e fundit të qeverisë së Edi Ramës, që i jep bashkëshortit të Olta Xhaçkës tokë në fshatin Gjilekë të Himarës, për të ndërtuar hotel.
Sipas vendimit të qeverisë, Artan Gaçi, bashkëshorti i ministres së Jashtme, është investitor strategjik dhe për këtë qëllim i jepet toka.
Në vijim Berisha në mitingun përmbyllës të fushatës në Lushnje, deklaroi se vota për kandidatët e ‘Shtëpisë së Lirisë’ është hapja e rrugës për zgjedhje të reja të parakohshme.
‘Më 6 mars me votën tuaj keni një shans historik për të hapur dyert e zgjedhjeve të reja të parakohshme për Shqipërinë. Nuk mundet që parlamenti i patronazhistëve, bandave, abuzimit dhe vjedhjeve të mëdha të vazhdojë më tutje në Tiranë”, përfundoi Berisha. m.k
