Policia e Shkodrës nuk ka bërë asnjë përpjekje pëe nxjerrjen e gruas së zhdukur në një shpellë në fshatin Meshqerraj në Shkodër.
Prej 24 orësh policia vetëm ka bërë konstatimin dhe më pas nuk ka kryer asnjë veprim. Sipas policisë ata kanë vendosur të nisin kërkimet nesër ndërkohë që gruaja është zhdukur që dje.
Për më shumë policia e Shkodrës parashikon se ajo ka vdekur ndërkohë nuk ka asnjë të dhënë se ajo ka vdekur. Është krej e papërgjegjshme që policia për një ngjarje të tillë të aktivizojë trupat speciale dy ditë më vonë.
Të afërmit e nënës së tre fëmijëve e cila dyshohet se ka rënë në një shpellë në fshatin Meshqerraj në Shkodër u ankuan sot në emisionin stop se policia nuk i ka ndihmuar sa duhet.
Në një video të dërguar në emisionin “Stop”, banorët shprehen se kanë lajmëruar autoritetet që mbrëmë në darkë dhe ende nuk është gjetur trupi i 48-vjeçares. Ata bëjnë thirrje për ndihmë, pasi i kanë provuar të gjitha mundësitë për t’u futur në shpellë.
“Në këtë shpellë, dyshojmë, jo dyshojmë por sipas gjasave ka rënë gruaja e djalit të xhaxhait, nënë e tre fëmijëve. Buzë kësaj shpelle ka lënë një letër dhe një telefon. Kemi lajmëruar policinë në orët e vona ta darkës, na janë përgjigjur në një farë masë mbrëmë. Kanë bërë ekspertizën dhe kanë premtuar se do të zgjidhin problemin, por nuk kanë ardhur.
Ky vend quhet shpella e Potit. Policia ka bërë verifikimet dhe nuk kanë marrë asnjë masë. I lutem shtetit, mediave të na përkrahin në këtë tragjedi familjare, ne jemi munduar me të gjitha mjetet por është e pamundur hyrja në të. Në rast se ka mundësi ju lutem na ndihmoni”, denoncon i afërmi i 48-vjeçares në emsionin stop.
Njoftimi i policisë:
Malësi e Madhe, Shkodër/Informacion paraprak
Në Komisariatin e Policisë Malësi e Madhe, shtetasi G. H., banues në fshatin Meshqerraj, Njësia Administrative Gruemire , Malësi e Madhe, ka bërë kallëzim pasi bashkëshortja e tij, shtetasja Sh. H., 48 vjeçe është larguar nga banesa në orët e para të paradites së datës 24.12.2021 dhe nuk është kthyer më.
Duke vlerësuar maksimalisht situatën dhe rëndësinë e saj, shërbimet e Komisariatit të Policisë Malësi e Madhe në bashkëpunim me Forcat Operacionale të DVP Shkodër, kanë nisur kërkimet për gjetjen e saj.
Si rezultat i informacioneve të marra në rrugë operative, dhe pas kontrollit në territorin e fshatit Meshqerraj në afërsi të një gryke (shpellë) janë gjetur telefoni i saj dhe një fletore. Dyshohet se kjo shtetase të jetë vetëhedhur në këtë grykë dhe për pasojë dyshohet se ka humbur jetën.
Për shkak të territorit shumë të vështirë nuk u bë e mundur gjetja e saj dhe kërkimet janë ndërprerë, pasi pritet që në vendin e ngjarjes, në orët e para të mëngjesit të mbërrijë edhe forcat e RENEAS dhe FNSH-së me mjete të specializuara për të bërë të mundur gjetjen e trupit të shtetases Sh. H.
Nga ana e grupit hetimor, nën drejtimin e Prokurorisë, po punohet për të sqaruar me detaje motivet e kësaj ngjarjeje.
