Kryetari i Partisë Demokratike, Sali Berisha, gjatë takimit entuziast dhe masiv me shqiptarët në Shtetet e Bashkuara, zhvilluar në New Jersey ka folur për heqjen e ndalimit të hyrjes në SHBA, duke e cilësuar këtë si një ditë që shumë njerëz e kishin menduar të pamundur.
Berisha tha se vendimi për t’i mohuar hyrjen në SHBA katër vite më parë ishte rezultat i një agresioni të padrejtë ndaj dinjitetit të tij dhe jo i vullnetit të vetë Shteteve të Bashkuara.
“Është një ditë që shumëkush e ka menduar të pamundur. E ka menduar si një ditë që nuk do ta shihnim ndonjëherë”, u shpreh Berisha, duke shtuar se në momente të caktuara shumë shqiptarë kanë pyetur veten nëse mund të sfidonin një padrejtësi përballë forcave shumë më të mëdha.
Sipas Berishës, përgjigjja ndaj kësaj pyetjeje është identiteti dhe qëndresa e shqiptarëve.
“Ne jemi shqiptarë! Sepse ne jemi shqiptarë dhe qëndrojmë e luftojmë të pamposhtur për dinjitetin tonë. Sepse ne jemi shqiptarë, luftojmë dhe qëndrojmë të vendosur për familjet tona”, tha ai.
Berisha kujtoi se ndalimi i hyrjes në SHBA erdhi në një kohë kur, sipas tij, ai kishte disa vite që nuk ushtronte pushtet dhe ishte tërhequr thuajse plotësisht nga jeta politike.
Ai deklaroi se gjatë gjithë kësaj periudhe kishte ruajtur besimin tek Shtetet e Bashkuara dhe tek vlerat mbi të cilat është ndërtuar vendi.
“E qartë si kristali se kjo padrejtësi nuk po vinte nga Shtetet e Bashkuara, por po vinte nga axhendat antiliri, antikomb, të asaj që vetë presidenti Donald Trump e ka emërtuar si ekstremi i majtë”, deklaroi Berisha.
Duke iu referuar një shprehjeje të Abraham Lincoln, Berisha tha se kishte vendosur të ringrihej dhe të niste betejën për të ndryshuar situatën.
“Rëndësi nuk ka sa herë rrëzohesh, por sa herë ngrihesh. Dhe unë vendosa të ringrihem”, u shpreh ai.
Berisha e lidhi ndryshimin e situatës edhe me zgjedhjen e Donald Trump si president i SHBA-së në nëntor 2024. Sipas tij, pas kësaj, bota e lirë filloi të ringrihet nga agresioni i ekstremit të majtë dhe efektet e këtij ndryshimi mbërritën edhe në Shqipëri.
Në fjalimin e tij, Berisha sulmoi edhe personat që, sipas tij, kishin kontribuar në vendimin për ndalimin e tij në SHBA.
“Ata që firmosën ndalimin tim, sot janë non-grata vetë në vendin e tyre. Ata që përgatitën mashtrimet ndaj meje në Shqipëri, sot janë prapa hekurave, ndërsa unë sot po qëndroj me dy këmbë mbi atë tokë që ata mendonin të ma ndalonin përgjithmonë”, tha kreu i PD-së.
Në vijim, Berisha shprehu mirënjohje për shqiptarët në SHBA që, sipas tij, e mbështetën që në momentet e para dhe gjatë periudhës më të vështirë.
Ai falënderoi gjithashtu administratën e presidentit Donald Trump dhe sekretarin e Departamentit të Shtetit, Marco Rubio, për vendimin që i mundësoi rikthimin në Shtetet e Bashkuara.
“Mirënjohje të pakufishme ndaj administratës së presidentit Donald Trump, sekretarit të Departamentit të Shtetit, Marco Rubio, për vendimin e tij”, deklaroi Berisha.
Në një tjetër pjesë të takimit me shqiptarët në SHBA, Berisha e cilësoi diasporën shqiptare në Shtetet e Bashkuara si një faktor të rëndësishëm për kombin shqiptar.
“Diaspora shqiptare në Shtetet e Bashkuara është fati i bardhë, fati i mirë i kombit shqiptar”, u shpreh ai.
Berisha kujtoi gjithashtu vizitën e tij të parë në SHBA, në mars të vitit 1991, duke e cilësuar atë si një nga udhëtimet më emocionuese të jetës së tij. Ai vlerësoi kontributin e brezave të diasporës shqiptare në përmbysjen e diktaturës komuniste në Shqipëri dhe në mbështetjen për lirinë e Kosovës. m.k
