Kryetari i Partisë Demokratike, Sali Berisha, ka kërkuar nga diaspora shqiptare në Shtetet e Bashkuara të bashkohet me protestën kundër qeverisë së Edi Ramës, duke e cilësuar largimin e kryeministrit si kusht për shpëtimin dhe ripërtëritjen e Shqipërisë.
Gjatë takimit të gjerë me diasporën shqiptare në New Jersey, Berisha tha se beteja e opozitës nuk lidhet vetëm me ndryshimin e qeverisë, por me atë që ai e cilësoi si betejë për dinjitetin e Shqipërisë dhe për të ardhmen e familjes shqiptare.
“Nëse duam të ripërtërijmë Shqipërinë, kjo arrihet vetëm duke larguar nga pushteti Edi Ramën”, deklaroi Berisha.
Ai u shpreh se, pavarësisht vështirësive, opozita do ta fitojë këtë betejë.
“Ju jap fjalën se do të arrijmë ditën e shpëtimit të Shqipërisë. Se do fitojmë betejën e dinjitetit kombëtar. Edi Ramën do ta largojmë nga qeveria dhe asgjë në botë nuk na ndal sot në këtë qëllim”, tha kreu i PD-së.
Berisha e lidhi largimin e Ramës edhe me luftën kundër krimit të organizuar dhe drogës, duke pretenduar se Shqipëria është shndërruar në një eksportues madhor droge.
“Duke larguar Edi Ramën, ne shpëtojmë Shqipërinë. Duke larguar Edi Ramën, ne çlirojmë edhe një copë të Evropës. Por duke larguar Edi Ramën, ne u bëjmë një shërbim të gjitha kombeve mike”, u shpreh ai.
Në këtë kontekst, Berisha kërkoi mbështetjen e Shteteve të Bashkuara, duke iu referuar edhe sekretarit amerikan të Shtetit, Marco Rubio.
“Kam besim të madh se shqiptarët do kenë ndihmën e tij, ndihmën e tyre, për të shpëtuar nga narkoshteti i ndërtuar në trojet e tyre”, deklaroi Berisha.
Sipas tij, përballja me narkoshtetin në Shqipëri është një mision që nuk lidhet vetëm me interesat e shqiptarëve, por edhe me interesat e vendeve mike.
Berisha iu referua gjithashtu mesazhit të sekretarit Rubio në ditën e Pavarësisë së Shqipërisë, duke thënë se për herë të parë, sipas tij, një zyrtar i këtij niveli iu referua karteleve të drogës dhe bashkëpunëtorëve të tyre si rrezik për Shtetet e Bashkuara.
Berisha: Shqipëria është “kopshti eksperimental” i ideve të Sorosit
Në fjalën e tij, Berisha sulmoi edhe politikat sociale dhe ligjore të qeverisë, duke e cilësuar Shqipërinë si kopshtin eksperimental të ideve të përçudnuara të George Sorosit dhe ekstremit të majtë.
Ai ngriti pretendime edhe për trajtimin e çështjeve të identitetit gjinor dhe familjes, duke deklaruar se në Shqipëri, sipas tij, fëmijëve 13-vjeçarë u jepen hormone dhe se në tekstet shkollore prindërit emërtohen me numra.
Berisha e cilësoi familjen si një nga çështjet kryesore të betejës së tij politike.
“Në rrezik të madh është familja shqiptare. Në rrezik të madh është ajo e cila ka mbajtur kombin mbi supe në shekuj dhe mijëvjeçarë dhe së cilës ne i dedikojmë të gjithë qenien tonë. Ndaj dhe, beteja jonë është një betejë për ekzistencë të familjes shqiptare”, tha ai.
Thirrje diasporës për protestën në Shqipëri
Një pjesë e rëndësishme e fjalimit iu kushtua largimit të shqiptarëve nga vendi. Berisha pretendoi se gjatë 10 viteve të fundit 1 milion e 99 mijë shqiptarë janë larguar drejt zonës Schengen dhe se, duke përfshirë edhe destinacione të tjera, “47% e kombit ka ikur nga Shqipëria”.
Ai tha se rikthimi i shqiptarëve dhe ripopullimi i vendit duhet të jetë një nga prioritetet kryesore kombëtare.
“Është koha për veprim! Është emergjencë! Rruga e rikthimit, e ripopullimit kalon nga largimi i Edi Ramës”, deklaroi Berisha.
Kreu i PD-së tha se Shqipëria ka pasuri të mëdha, por sipas tij ato nuk po shndërrohen në mirëqenie për qytetarët për shkak të keqadministrimit dhe mungesës së shtetit ligjor.
“Por ato pasuri kërkojnë administrim, kërkojnë ligjin. Kërkojnë që të mos jenë mallkim për qytetarët, por të shtrohen në të mira për qytetarët”, u shpreh ai.
Berisha akuzoi gjithashtu qeverinë se bllokon ligjin dhe institucionet dhe se përdor mandatet parlamentare për të penguar veprimin e prokurorisë. Ai kërkoi vendosjen e shtetit ligjor, funksionimin e institucioneve dhe luftë me “zero tolerancë” ndaj krimit të organizuar dhe korrupsionit.
Në fund të fjalës, Berisha iu drejtua drejtpërdrejt diasporës shqiptare, duke i kërkuar të mbështesë protestën që po zhvillohet prej tre muajsh në Shqipëri.
“Prej tre muajsh, rinia dhe qytetarët e Tiranës janë angazhuar në një protestë, më të madhen që nga vitet ’90. Në këtë protestë, ata kërkojnë largimin e Edi Ramës. Kërkojnë veprimin, funksionimin e institucioneve. Kërkojnë mbrojtjen e pasurive publike”, tha ai.
Berisha e mbylli me një thirrje për shqiptarët jashtë vendit: “Ndaj dhe unë ju bëj thirrje ju, i bëj thirrje diasporës shqiptare kudo në botë, të japë kontributin e saj në këtë protestë. Partia Demokratike e mbështet fuqishëm atë.”m.k
