Kryeministri Edi Rama lajmëroi sot mbështetjen financiare për fëmijët e dëshmorëve të atdheut, mjekëve që kanë humbur jetën nga Covid, apo ata që kanë humbur jetën e tyre, duke mbrojtur jetën e personave të tjerë.
Sipas Ramës ata do të përfitojnë ndihmë ekonomike deri në moshën 18-vjeçare, dhe në rast se ndjekin arsimin e lartë deri në moshën 25-vjeçare.
Pjesë nga fjala e Ramës:
Ne mund ti përcjellim si fakte dhe jo më si qëllime të mira, disa ndryshime të rëndësishme të miratuara në Kuvend, si dhe një ndryshim që do të bëjmë sot. Duke nisur nga Janari, të gjitha nënat me 3 ose më shumë fëmijë, në skemën e ndihmës ekonomike, do të përfitojnë dyfish, ashtu si dhe tëe gjitha nënat dhe gratë e dhunuara, apo me fëmijë me aftësi ndryshe, apo jetimët që janë në skemën e ndihmës ekonomike.
Sot shtohet dhe një kategori tjetër, për fëmijët me statusin e ‘fëmijë nën mbrojtjen e Republikës’, që materializon një qasje të vazhdueshme të kësaj shumice, në raport me ata që ndihen më të dobët.
Me votën e sotme Kuvendi, do të përcaktojë një status të ri, për të gjithë fëmijët, apo personat në kujdestari të dëshmorëve të ardheut, të mjekëve apo infermierëve që kanë humbur jetën si pasojë e Covid 19, për personat që kanë humbur jetën për të mbrojtur persona të tjerë, të shtetasve shqiptarë që kanë humbur jetën në kushtet e gjendjes së jashtëzakonshme.
Përmes kësaj nisme, shteti merr në mbrojtje dhe përkujdesje të veçantë, të gjithë fëmijët e këtyre kategorie prindërish, për të përballuar jetën në kushtet e humbjes së prindërve. Statusi ‘fëmijë nën kujdesin e Republikës’, sigurohet deri në 18 vjeç, dhe vazhdon deri në 25 vjeç nëse ata vazhdojnë arsimin e lartë. a.b
