Elton Metaj, perosni që vrau ish bashkëshorten e tij, Sabrina Bengaj, ka shkruar një letër nga ambientet e paraburgimit, ku rrëfen vrasjen e ish-bashkëshortes së tij.
Ai shkruan se pas daljes nga spitali ka pasur takime dhe komunikim të vazhdueshëm me ish-gruan e tij, por ka qenë babai i Sabrinës, Partizani ai që e ka kërcënuar vazhdimisht atë, pasi ka marrë vesh se çifti ishte rikthyer, ndërsa thotë se prej 15 ditësh një makinë e ndiqte nga pas. Eltoni shkruan në letër se ai ka shkuar që të denoncojë kërcënimet në polici, por askush nuk e ka pritur në komisariat.
Një ditë më parë u mbajtën protesta në Tiranë e Fier ku u kërkua drejtësi për Sabrinën. Protestuesit akuzuan policinë dhe drejtësinë se lejuan Metajn të kryente krimin e rëndë.
Letra e plotë e Elton Metaj:
Unë Elton Meta dua të sqaroj opinionin publik se çfarë ka ndodhur përsa i përket veprimit tim. Jam liruar nga spitali i Zaharisë më datë 26 korrik, një ditë më pas jam takuar me ish-bashkëshorten time. Më datë 1 gusht, Sabrina merr leje nga puna dhe kemi ndenjur bashkë, kemi kryer marrëdhënie seksuale.
E shoqëroja në punë, por gjithmonë ruhej nga babai i saj që të mos e kuptonte se ne i kishim rregulluar muhabetet. Mamaja, vëllai dhe kunata e saj ishin në dijeni të bashkimit tonë.
Kur u ktheva nga Greqia, pashë që gjërat kishin ndryshuar. Ish-vjehrri filloi me kërcënimet. Duke e njohur atë i mora seriozisht. Kam shkuar në Polici dhe oficeri i policisë, Eugeni më tha se nuk ka kohë, hajde pas 2-3 ditësh. Sabrina më tha se babai e ka marrë vesh dhe do na zhdukte të dyve.
Ish-vjehrri më shkruajti sërish në ‘Messenger’ dhe më la takim e më tha ‘do të të zhduk’. Pasi hyra në banesë, ish-bashkëshortja po fliste në ‘Skype’ me të dashurin.
Shkrepa armën që më doli nga kontrolli dhe mësova se Sabrina kishte ndërruar jetë. Për sa më sipër jam fajtor për aktin, por dua të sqarohen të gjithë se çfarë kam deklaruar. Unë kam shkrepur armën, por vrasjen e ka bërë babai i saj.
