Akademiku Artan Fuga ka komentuar sot një postim të ambasadores suedeze sipas se cilës qeveria Rama ka 70 për qind gra dhe prandaj është edhe mirë, edhe më e mirë.
Komenti i Fugës:
Në rrjetet sociale në Shqipëri po qarkullon një status i zonjës ambasadore të Suedisë në Tiranë. Sipas tekstit, shkruar nga dora e saj, thuhet se qeveria është e mirë, është gjë e mirë, sepse ka 70 përqind gra.
Unë këtu nuk do të merrem me qeverinë sepse është gjëja e fundit në botë që më intereson, as me gratë apo burrat e saj. Madje dua të them se respekti im për mbretërinë e Suedisë dhe për shoqërinë suedeze është i jashtëzakonshëm.
Nuk dua as të komentoj statusin e zonjës ambasadore sepse e fus padashje në çështje shqiptaro-shqiptare që dalin jashtë kompetencave të veta.
Unë nxjerr nga ai status këto përfundime logjike që nuk ka shqiptar që t’i gëlltisë:
1. Sa më shumë gra aq më më mirë për qeverinë, pra nëse kemi një qeveri 100 për 100 me gra, arrijmë të mirën perfekte. Shkojmë në fundin e kohëve!
2. Cdo grua që futet në qeveri për faktin e vetëm se është grua është gjithmonë më mirë se cdo burrë sado i zoti, kompetent, i besueshëm të jetë, madje edhe nëse është homoseksual.
3. Një grua është e zonja për të qeverisur vetëm për faktin se është grua.
4. Zonjat ne qeveri janë futur si gra, thjesht nga gjinia e seksi i tyre, dhe jo nga aftësitë e tyre politike për forcën politike që i mandaton.
5. Këto zonja janë përfaqësueset autentike të grave të Shqipërisë. Në këtë aspekt nuk kuptohet se laj thaj vijnë vërdallë vetëm disa prej tyre gjithmonë!
Këto përfundime logjike nxorra.
Ndërkaq që të jem i qartë diskutimi se kush është menaxher, prind, shofer, polic, hajdut, politikan, ministër, me i ose e zoti ose zonja, burri apo gruaja është një debat që vazhdon që nga koha kur Adami dhe Eva ishin në Eden dhe i Zoti i fajësoi të dy njëlloj!
Me një fjalë janë llogje pa bereqet!
