Policia e Vlorës arrestoi sot pak orë pas aksidentit, drejtuesin e makinës Audi, përplasja e të cilit me një makinë Toyota solli shuarjen e familjes Gusho nga Patosi, me 4 persona.
“Specialistët e Qarkullimit Rrugor në Drejtorinë Vendore të Policisë Vlorë arrestuan në flagrancë shtetasin: Igli Madani, 22 vjeç, banues në Tiranë, pasi duke drejtuar automjetin tip “Audi”, në aksin rrugor Fier-Vlorë, dyshohet se ka humbur kontrollin dhe ka goditur nga mbrapa automjetin tip “Toyota” me drejtues shtetasin E. G., 44 vjeç dhe si pasojë ndërruan jetë 4 shtetasit që udhëtonin me mjetin mjetin “Toyota”. Gjithashtu, si pasojë ka mbetur i dëmtuar vetë drejtuesi i mjetit “Audi” dhe dy pasagjerët, të cilët ndodhen në spital, nën kujdesin e mjekëve, njoftoi policia e Vlorës.
Mjeti që Igli drejtonte është në emër të babait të Igli Madanit, B. Madani, i cili është biznesmen i njohur në fushën e tregtimit të makinerive të rënda të ndërtimit.
Materialet në ngarkim të Igli Madanit i kaluan Prokurorisë pranë Gjykatës së Shkallës së Parë Vlorë për veprën penale “Shkelja e rregullave të qarkullimit rrugor”. a.b
