Me 89 vota pro 3 abstenim dhe 17 kundër, u miratua sot në Kuvend, akti normativ “Për masat parandaluese në kuadër të forcimit të luftës kundër terrorizmit, krimit të organizuar, krimeve të rënda dhe konsolidimit të rendit e sigurisë publike” e njohur si paketa “Anti KÇK”, e cila kaloi si akt normativ nga Këshilli i Ministrave më 31 janar.
Paketa e re ligjore, pagëzuar nga kryeministri Rama si paketa “AntiKÇK”, (anti-kap-ç’a-të-kapësh), sipas qeverisë, synon forcimin e luftës kundër krimit të organizuar, terrorizimit dhe krimeve të tjera të rënda.
Kjo paketë ka ngjallur një sërë reagimesh kundër, me pretendimin se fuqizon Policinë e Shtetit dhe i jep kompetenca të gjyqësorit.
Gjithashtu, Kuvendi miratoi sot edhe projekt-ligjin për administrimin e pronave të sekuestruara nga Operacioni Forca e Ligjit.
