Prokuroria e Tiranës ka nisur hetimet për dëshminë e ish-oficerit të Krujës i cili rrëfeu për kërcënimin me armë ndaj tij nga socialistët, teksa kërcënimi sipas ish policit ka ndodhur pas denoncimit nga Xhensila Maloku për kanosje e dhunë seksuale.
Mësohet se prokuroria e Tiranës ka administruar në dosje materialin filmik dhe zanor me dëshminë e ish-oficerit Emiljano Nuhu.
Sipas Prokurorisë, hetimet do të përqëndrohen tek verifikimi i rrethanave të paraqitura në dëshmi. Ndërkohë që grupi i hetimit pritet të këqyrë regjistrin e hyrje-daljeve të Komisariatit të Policisë së Krujës.
Ish-oficeri i policisë së Fushë Krujës, Emiliano Nuhu deklaron se është kërcënuar me jetë në zyrë nga djali i deputetit Rrahman Rahja në prani të deputetit Taulant Balla dhe kreut të bashkisë Krujë, Artur Bushi.
Deputeti i PS Taulant Balla, në një deklaratë ditën e djeshme e ka mohuar të gjitha akuzat, duke i konsideruar si inskenim nga ana e opozitës.
Gjithashtu dhe personat e tjerë të përmendur në dëshmi, deputeti Rrahja dhe Bushi mohojnë të kenë qënë në komisariat atë ditë.
