Edhe pse mund të gjesh bosh një vend parkimi të vijëzuar me vijat e bardha pranë banesës tuaj, nëse nuk jeni të pajisur me kartën e rezidentit, rrezikoni të gjobiteni nga 1 mijë deri në 3 mijë lekë. Pulla e rezidentit ju jep mundësinë që të parkoni në vendet e dedikuara në Tiranë për banorët të cilat nuk ju duhet të paguani asgjë në këmbim. Zona 4 e kryeqytetit që është edhe qendra e Tiranës ka përfunduar me shpërndarjen e kësaj karte ndërkohë që administrata e Tirana parking po fokusohet tek zona 1 që përfshin Bulevardin Zogu i Parë rrugën e Durrësit dhe të tjera.
“Ky është një projekt që ka një prioritet, ka filluar 3 muajt e fundit të përshkallëzohet shpërndarja e pullave të rezidentit. Jemi duke shtrirë dhe përfunduar pajisjen me pullën e rezidentit për të gjithë banorët e Zonës 4 dhe ka filluar shtrirja ne zonën 1, konkretisht kemi në fazë pilot blloku tek ‘Kafe Flora’ ku janë banorët janë pajisur me 300 karta rezidenti. Për zonën 1 duke qenë se është një nga zonat më të mëdha të Tiranës, për momentin jemi duke i pajisur banorët me vërtetim i cili është i barasvlershëm me pullën e rezidentit”, deklaroi drejtoresha e Tirana parking, Egla Zere, raporton BalkanËeb.
Çfarë përfitimesh ka një banorë që pajiset me kartën e rezidentit?
“Nëse ju jeni rezident i zonës 1 keni të drejtë të parkoni brenda hapësirave publike në ¼ e qytetit të Tiranës”.
Po sa kushton pajisja me këtë pullë dhe çfarë dokumentesh duhet të paraqisni në drejtorinë e Tirana parking?
“Karta e rezidentit është falas, të paktën deri ne fund të vitit ajo do të jetë falas. Për të përfituar pullën e rezidentit çdo qytetar duhet të paraqesë 3 dokumente; Një vërtetim banore lagje, certifikatë familjare dhe lejen e qarkullimit të mjetit”.
Ndërkohë që për qytetarët që duhet të parkojnë me pagesë automjetet e tyre në qendrën e Tiranës kjo drejtori e bashkisë ka filluar negociatat me operatorët e telefonisë që parkimi me mesazh të jetë i mundur edhe nga abonentët që kanë ofertat mujore në telefonat celularë.
“Jemi në proces e sipër dhe shpresoj se do të marrim një dritë jeshile për ta pasur sa më të thjeshtë këtë shërbim për qytetarët e Tiranës”, tha Zere.
