Policia bën “spektakël”. Bllokon drogë, por jo pronarët dhe procedon kryepleq e inspektor për moskallëzim.
Rasti më i fundit ka ndodhur në Vlorë, ku Policia ka rritur të bllokojë një makinë me drogë, por jo pronarin e saj, apo poseduesin e bimëve narkotike.
Për pasojë, për “të mos dalë bosh”, ka proceduar ata që ka kapur, kryepleq e inspektorë pyjesh.
Burime zyrtare të Policisë Vendore të Vlorës, bëjnë të ditur se janë zbuluar 9 parcela të kultivuara me kanabis sativa në fshatin Lapardha të Vlorës gjatë një operacioni të koduar “Shadow”, ndërsa është kapur edhe një makinë e mbushur me drogë.
Gjatë këtij aksioni, u asgjësuan 339 rrënjë kanabis sativa që varionin nga 20 deri në 100 cm.
Në lidhje me këtë ngjarje, Policia ka proceduar penalisht 4 persona për moskallëzim krimi dhe shpërdorim detyre.
Ata janë
1 – F. H., 63 vjeç, banues në fshatin Gumenicë, me detyrë: Kryetar i Njësisë Administrative Kotë.
2 – A. C., 53 vjeç, banues në fshatin Lapardha, me detyrë: Kryeplak i fshatit Lapardha.
3 – M. H., 52 vjeç, banues në fshatin Drashovicë, me detyrë: Inspektor i Pyjeve në Njësinë Administrative Kotë.
4 – B. D., 51 vjeç, banues në fshatin Mavrovë, me detyrë: Përgjegjës i Inspektorëve të Pyjeve në Bashkinë Selenicë.
Gjithashtu, në vijim të këtij operacioni, gjatë kontrollit të territorit konkretisht në aksin rrugor Kotë-Drashovicë, Policia e Vlorës ka bllokuar një automjet të dyshimtë i cili u braktis nga drejtuesi i tij.
Nga kontrolli i ushtruar në mjetin tip “Fiat Panda” me targë AA 369 MK, është gjetur një sasi me lëndë narkotike e vendosur në 7 paketime të përmasave të ndryshme dhe të mbështjella me natriban transparent, e cila pas peshimit ka rezultuar me peshë totale prej 37 kilogramë e 700 gramë kanabis sativa.
Nga veprimet hetimore të Policisë, ka rezultuar se në këtë ngjarje dyshohet se janë përfshirë autorët A. I., 26 vjeç dhe B. A., 30 vjeç, banues në Kaninë.
