Nga data 6 maj hyn në fuqi ligj për faljen e borxheve për bizneset dhe individët.
Sipas Drejtorisë së Përgjithshme të Tatimeve janë tre kategori subjektesh që përfitojnë nga ky ligj. Në skemë përfshihen subjektet e regjistrit aktiv, pasiv ose të çregjistruar për detyrime ndaj tatimeve por dhe subjektet debitore ndaj administratës doganore.
Fshirja ose shuarja pjesërisht dhe me kusht e gjobave dhe kamatëvonesave, kontributeve dhe sigurimeve shoqërore e shëndetësore, realizohet nëse paguhet detyrimi apo principali për periudhat tatimore janar 2011 – dhjetor 2014.
Përfitues do të jetë edhe subjektet që kanë detyrime por të cilët janë çregjistruar në Qendrën kombëtare të Biznesit deri në 6 maj.
Në zbatim të këtij ligji hiqen nga qarkullimi 140 mijë mjetet e regjistruara në Drejtorinë e Përgjithshme të Shërbimit të Transportit Rrugor, për të cilat nuk është kryer asnjë veprim me këto mjete pas datës 31 dhjetor 2011 duke iu shuar detyrimi për taksën e regjistrimit të përvitshëm të mjeteve, taksën vjetore e qarkullimit, taksën vjetore e mjeteve të përdorura, taksa e mjeteve luksoze, gjobat e llogaritura për efekt të mospagimit të taksave.
Dokumentet që duhet të paraqiten nga qytetarët për çregjistrimin e mjeteve është leja e qarkullimit, certifikata e pronësisë dhe targat e mjetit.
Po ashtu bëhet e ditur se administrata tatimore, nëse ka filluar mbledhjen me forcë të detyrimeve, e ndërpret këtë proces nëse subjekte është përfitues në ligjin e faljes. Në total nga administrata qendrore dhe vendore do të falen 91 miliardë lekë.
Më 6 maj nis falja fiskale për 140 mijë automjete
