Elidon Mehmeti, 39-vjeçari i cili u ekzekutua një natë më parë në qytetin e Vlorës, njihet nga policia shqiptare si person me precedent kriminal, i përfshirë në fushën e narkotikëve.
Burime zyrtare të policisë sqarojnë se nga hetimet e kryera ka rezultuar se Mehmeti është arrestuar në Itali për “Trafikim të Lëndëve Narkotike”.
Elidon Mehmeti u ekzekutua mbrëmë rreth orës 23.00, brenda makinës së tij tip “Ford”, me targa AA 709 HM, teksa po lëvizte në drejtim të banesës së tij, në Lagjen “pavarësia” Vlorë. Atentati është bërë nga persona ende të paidentifikuar, të cilët qëlluan me armë zjarri nga një tjetër makinë.
Dyshohet se Mehmeti është ndjekur nga autori dhe është qëlluar në një moment kur makina, për shkak edhe të punimeve që po bëhen në zonë, ka qenë në limitet e shpejtësisë.
Pasi ka ikur për rreth 50 metra me makinën ndezur, mjeti është ndalur dhe 35vjeçari ka tentuar të dalë për të kërkuar ndihmë.
Breshëria ka terrorizuar banorët e paktë që janë gjendur afër vendit të ngjarjes në ato momente.
Kalimtarët janë afruar për ta ndihmuar ndërsa autoambulanca, e cila ka mbërritur në një kohë të shpejtë, e ka shoqëruar në spital. Deri në këto momente, Policia ka shoqëruar 8 persona me të cilët po punohet për zbardhjen e ngjarjes.
Vijojnë hetimet për dokumentimin e plotë ligjor të ngjarjes dhe për arrestimin e autorëve.
DETAJE/ Vlorë, Policia: Ja precedentët kriminalë të 39-vjeçarit të ekzekutuar mbrëmë me 15 plumba
