Opozita i është përgjigjur pozitivisht ftesës së mazhorancës për dialog.
Në përfundim të tryezës që kreu i PD-së Lulzim Basha zhvilloi me aleatët, zyrtarisht konfirmohet kjo gatishmëri.
Duke artikuluar katër kërkesa, opozita bënë të ditur se tryeza nuk duhet të jetë fasadë, por të jetë e vërtetë.
“Koalicioni opozitar duke vlerësuar momentin kritik për Shqipërinë dhe shqiptarët për shkak të kërcënimit të zgjedhjeve dhe të votës së lirë dhe të ndershme nga krimi dhe droga me lidhje qeveritare, shpreh gatishmërinë për një tryezë dialogu të vërtetë dhe jo fasadë, me përfaqësuesit e partive të koalicionit qeveritar me qëllim krijimin e kushteve për zgjedhje të lira e të ndershme, përmes një qeverie me mbështetje të gjerë politike që do të garantojë:
1-Zbatimin e plotë të ligjit të dekriminalizimit.
2-Luftë efikase kundër narkotrafikut, krimit të organizuar dhe parave të drogës.
3-Përgatitjen e zgjedhjeve të lira e të ndershme.
4-Zbatimin e reformës në drejtësi, sipas përcaktimeve kushtetuese të 22 korrikut”, thuhet në reagimin zyrtar të opozitës.
