Sekretari për Çështjet Ligjore dhe Zgjedhore në Partinë Demokratike, Marash Logu, ka reaguar pas seancës plenare të zhvilluar këtë të hënë, duke akuzuar mazhorancën socialiste për shkelje të Kushtetutës dhe të Rregullores së Kuvendit gjatë procedurave për shqyrtimin dhe miratimin e projektligjeve.
Përmes një reagimi publik, Logu rendit pesë shkelje që, sipas tij, janë konsumuar gjatë seancës:
- Njoftimi i seancës plenare. Sipas Logut, seanca e orës 15:00 u njoftua në orën 10:00, në kundërshtim me nenin 75, pika 2 të Kushtetutës dhe nenin 27/1, pika 3 të Rregullores së Kuvendit, të cilat parashikojnë që rendi i ditës të njoftohet jo më vonë se dy ditë përpara zhvillimit të seancës.
- Procedura e përshpejtuar. Ai pretendon se vendimi për shqyrtimin me procedurë të përshpejtuar të projektligjit për ratifikimin e marrëveshjes së huasë dhe miratimi i tij në të njëjtën ditë bien ndesh me nenin 83, pika 2 të Kushtetutës dhe nenin 28, pika 4 të Rregullores së Kuvendit, sipas të cilave shqyrtimi dhe miratimi nuk mund të kryhen pa kaluar të paktën një javë.
- Mungesa e dokumentacionit. Sipas Logut, deputetëve nuk iu vu në dispozicion teksti i marrëveshjes dhe relacioni shoqërues, në kundërshtim me nenin 75, pika 2 të Kushtetutës dhe nenin 69, pika 2 të Rregullores së Kuvendit.
- Raporti financiar. Logu shprehet se deputetët nuk patën mundësi të njiheshin me raportin që justifikon shpenzimet financiare të projektligjit, duke e cilësuar këtë si shkelje të nenit 82, pika 1 të Kushtetutës dhe nenit 68, pika 2 të Rregullores së Kuvendit, që kërkojnë shoqërimin e çdo projektligji me karakter financiar me raportin përkatës.
- Liria e deputetëve për debat dhe votim. Në reagimin e tij, Logu pretendon se deputetëve iu mohua e drejta për t’u shprehur, për të paraqitur amendamente dhe për të votuar në mënyrë të informuar, në kundërshtim me dispozitat kushtetuese dhe ligjin për statusin e deputetit, të cilat garantojnë lirinë e shprehjes dhe pjesëmarrjen e plotë në procesin parlamentar.
Deklaratat e Marash Logut u bënë pas zhvillimit të seancës plenare, e cila u shoqërua me tensione në sallën e Kuvendit dhe debate mes mazhorancës dhe opozitës.
