Ka nisur këtë të hënë seanca plenare e Kuvendit të Shqipërisë, ku deputetët pritet të shqyrtojnë miratimin e procesverbalit të seancës së 23 korrikut, njoftimet, si dhe projektvendimin për ndryshimin e vendimit nr. 87/2026 “Për caktimin e anëtarëve zëvendësues në përbërjen e komisioneve të përhershme të Kuvendit”, i cili do të miratohet me shumicë të thjeshtë votash.
Ndërkohë, jashtë godinës së Parlamentit, qytetarë të mbledhur në protestë kanë rrethuar Kuvendin me thirrjet: “Nuk na përfaqësoni, Parlament i krimit”. Situata është shoqëruar me tensione mes protestuesve dhe forcave të policisë.
Sipas raportimeve nga protesta, policia ka përdorur spraj, ndërsa një i ri ka shfaqur probleme shëndetësore dhe është transportuar me autoambulancë drejt spitalit për të marrë ndihmë mjekësore.
Po ashtu, policia ka shoqëruar disa protestues, mes tyre edhe Arben Kolën, një prej organizatorëve të protestës. Pas ndalimit të tij, janë kryer edhe shoqërime të tjera, ndërsa pamjet nga vendngjarja tregojnë momente përplasjesh dhe ndalimesh me forcë.
Nga foltorja e Kuvendit reagoi kreu i Partisë Mundësia, Agron Shehaj, i cili akuzoi mazhorancën për përdorimin e policisë ndaj protestuesve. Ai deklaroi se Arben Kola u shoqërua nga dhjetë efektivë policie vetëm pse protestonte dhe tha se masat e shtuara të sigurisë rreth Parlamentit tregojnë, sipas tij, frikën e qeverisë për t’u përballur me qytetarët.
Shehaj kritikoi gjithashtu mazhorancën për mbështetjen ndaj ish-zëvendëskryeministres Belinda Balluku, duke pretenduar se ajo po mbrohet përmes votave në Kuvend.a.b
