Ministri i Mjedisit Lefter Koka ka vijuar sërish sulmet e tij sot, ndaj qeverisë në përgjithësi, por edhe ndaj bashkisë së Durrësit dhe kryebashkiakut të saj, në veçanti.
Një ditë më pas ministri Lefter Koka nga Shijaku, ku mori pjesë në dhënien e certifikatave të legalizimit,
ka denoncuar politikën e punëve, sa për fasadë.
“Është e thjeshtë si ekonomia e një shtëpie. Nuk mundesh dot në një shtëpi të kërkosh një televizor me ngjyra, kur nuk ke gjërat më bazike për të jetuar. Dhe shpesh në fakt kjo ka ndodhur në disa qytete të Shqipërisë po ndoshta dhe në bashkinë e Durrësit. Ne sigurisht e duam qytetin të bukur, dhe fasadën e bukur po që të kemi një fasadë të bukur duhet të kemi një rrugë e cila nuk mbytet”, është shprehur Lefter Koka.
Ndërkohë, Vangjush Dako tentoi ta kalojë shpërthimin e ish-kolegut Koka me indiferencë.
“S’kam asgjë për të thënë. Nuk i marr seriozisht ato që thotë Koka”, është shprehur Dako.
Nga ana tjetër, prezenca e sotme e ministrit Lefter Koka, i vetëm në Shijak në dhënien e certifikatave të legalizimit, është një dëshmi i ngricës që po përjeton koalicioni qeveritar.
Ndërsa sot në Shijak, duhet të ishin edhe dy përfaqësues të lartë të qeverisë, ata munguan, zyrtarisht për shkak të ndryshimeve në agjendën e tyre.
Artan Lame kishte zgjedhur të shkonte në Lezhë, ndërsa ministrja Gjermeni tha për mediat se nuk e kishte konfirmuar pjesëmarrjen dhe nuk ishte e detyruar të shkonte në Shijak.
Qëndrimet e fundit të Lefter Kokës, por edhe të deputetëve të tjerë të LSI-së, nuk e fshehin një konflikt brenda për brenda qeverisë, ashtu sikurse nuk e fshehin as një kërcënim të mundshëm që po përjeton koalicioni PS – LSI.
KONFLIKTI/ Lefter Koka shigjeton sërish qeverinë, ironizon punët fasadë
