Një automjet brenda në det në zonën e Plazhit të Vjetër në Vlorë ka çuditur qytetarët mëngjesin e sotëm.
Makina tip “Fuoristradë”, ndodhet pak metra larg bregut dhe gati e mbuluar nga uji, pasi duket vetëm pjesa e sipërme e mjetit por nuk dihet se si ka përfunduar aty apo nëse ka pasur njerëz brenda.
Sipas informacioneve zyrtare nga Policia e Vlorës, makina është gjetur rreth orës 07:22 në det.
“Ngjarja ka ndodhur në zonën ujore të Plazhit të Vjetër, ku rreth 20-30 m larg nga bregu i detit është gjetur në ujë një automjet tip ‘Fuoristradë’. Automjeti ndodhet brenda në ujë dhe përreth tij deri tashmë nuk vërehet të ketë ndonjë material të kundërligjshëm”, deklaron Policia. Por nga burime në vendngjarje mendohet se mjeti ka trasportuar një tjetër mjet ujor që ka transportuar më pas drogë për në një vend fqinj që akoma nuk dihet.
Në bashkëpunim me Policinë Kufitare, po punohet për nxjerrjen nga uji të këtij mjeti.
