Prokuroria e Tiranës, rikthen për hetim demonstratën e opozitës së 8 Dhjetorit 2015 ku u shkatërrua edhe bunkeri pranë Ministrisë së Brendshme. Mësohet se prokurori i çështje kishte vendosur dërgimin e 9 të pandehurve në gjyq, por me vendim të shefit të akuzës kjo dosje është tërhequr për vazhdim hetimesh.
Prokuroria e Tiranës, ktheu për hetime të mëtejshme dosjen ndaj 9 demonstruesve të protestës së opozitës më 8 Dhjetor të vitit 2015.
ABC News ka mësuar se pas përfundimit të hetimeve nga prokurori i çështjes, dosja është relatuar për në Gjykatën e Tiranës, ku të 9 pandehurit do të gjykoheshin për 2 akuza. Por, ky vendim u shfuqizua nga shefi i akuzës së kryeqytetit, duke kthyer dosjen edhe njëherë për vazhdim hetimesh. Nuk jepen detaje të arsyetimit të kthimit të çështjes në hetim, por mësohet se dosja i është caktuar një prokurori tjetër.
Nga ana tjetër, në fund të tetorit të vitit të kaluar, prokurori i çështjes kishte vendosur dërgimin e 9 të pandehurve në gjyq për akuzën e “Shkatërrimit të pronës” dhe “Prishjes së qetësisë publike”. Këto akuza, sipas dosjes që tashmë është rikthyer për hetime, të 9 të pandehurit janë demonstrues të opozitës, të cilët më 8 dhjetor 2015 veç tjerash shkatërruan edhe bunkerin pranë Ministrisë së Brendshme. Në materialin e shpërndarë nga prokuroria në fund të tetorit, thuhej se 9 të pandehurit: Drini Zaimaj, Nexhemdin Shehu, Artan Kaçi, Besmir Vladi, Ylli Muça, Ervis Koçi, Aurel Filaj, Xhuljana Çala dhe Suzana Dimshi me veprimet e tyre kanë kryer veprat penale të “Shkatërrimit të pronës” dhe “Prishjes së qetësisë publike”.
Shumë demonstrues të tjerë, që u përfshinë në këtë ngjarje nuk u hetuan, pasi prokurorët e kanë pasur të pamundur identifikimin e tyre në mungesë edhe të provave të siguruara nga policia. Këta të fundit pretenduan se edhe disa deputetë kanë konsumuar disa vepra penale, por nga Prokuroria nuk u konstatua një gjë e tillë, duke i mos hetuar. Por me kthimin e çështjes për vazhdim hetimesh,burimet thonë se nuk përjashtohen hetimet edhe ndaj këtyre individëve.
Ndërkohë kundër protestës së Partisë Demokratike në 8 dhjetor doli edhe Bashkia e Tiranës. Për “ndëshkimin” e organizatorëve Bashkia vendosi një gjobë prej 160 milion lekësh, që rezultoi më pas e falsifikuar dhe Gjykata Administrative e rrëzoi. Por ende nuk është “identifikuar” falsifikatori i kësaj gjobe.
