Deputeti i PD-së Kastriot Islami ka pasur sot një përplasje me ministrin e Jashtëm, Ditmir Bushati, ku nuk kanë munguar edhe fjalët e rënda.
Ministri Bushati ishte në mbledhje për të folur për buxhetin 2017 për institucionin që drejton, kur Islami është shprehur “të ndalohet gjuha rrugaçe e ministrit”. Menjëherë pas Islamit ka reaguar edhe deputeti tjetër demokrat, Aldo Bumçi, i cili e ka quajtur Bushatin ministër mashtrues dhe gënjeshtar, “njeri i skandaleve”.
Më tej, Islami dhe Bumçi e kanë akuzuar Bushatin se ka futur në krizë edhe marrëdhëniet me Kosovën.
Tensionet u rritën ndjeshëm mes palëve, teksa kryetarja e komisionit,Arta Dade e cila që pas etiketimit të saj dje, si “heroinë” e Kolonjës nga Edi Rama, ka bërë të pamundurën që “ta meritojë” edhe sot këtë “titull”, duke i dalë në krah ministrit ët jashtëm.
Debatet
Kastriot Islami: Ti je një rrugaç, je rrugaç, injorant, nuk duhet të jesh më ministër… Injorant
Ditmir Bushati: Unë them 25, pse 25, pse 20, unë them kaq, ti thua… Loja e kungulleshkave.
Arta Dade: Ruani qetësinë, ruani etikën.
Kastriot Islami: Ai po flet me gjuhë rrugacësh, ne po themi mendimin tonë.
Arta Dade: Ju lutem shumë keni durim, ne kemi shumë durim, ju dëgjojmë, le të japë ministri qëndrim.
Kastriot Islami: Ça përgjigje do japë, ça përgjigje?
Arta Dade: Ruani qetësinë, kjo është e papranueshme gjuha që ju përdorni.
Kastriot Islami: Ai po flet me gjuhë rrugaçësh.
Arta Dade: Kini durim, ne kemi shumë durim, ju dëgjojmë, le të japë ministri sqarimin.
Ditmir Bushati: Ju kërkoj që duhet të mbani qëndrim për gjuhën e përdorur.
Arta Dade: Po patjetër do mbahet qëndrim.
Kastriot Islami: Për gjuhën tënde duhet të mbahet qëndrim, ti po flet si nga rruga, jo si ministër me anëtarët e komisionit të Jashtëm.
Ditmir Bushati: Unë nuk kam ndërmend të dëshmoj gjatësinë time, duke trashur zërin.
Arta Dade: Secili mban përgjegjësinë për atë që thotë, tërheq vëmendjen zotit Islami me keqardhje të jashtëzakonshme.
Kastriot Islami: Kush, ti po flet si në rrugë.
