Spaho: Byroja e Kuvendit është kthyer në plotësuese të tekave të PS

Në përfundim të mbledhjes së Byrosë së Kuvendit, ka reaguar nënkryetari i këtij institucioni si dhe nënkryetari i PD-së, Edmond Spaho.
Sipas Spahos, përjashtimi i Edi Palokës, 5 ditë nga Kuvendit, është një demonstrim se kjo Byro është shndërruar në plotësuese të tekave të PS-së, ndërsa me sjelljet, veprimet dhe vendimet e saj, mazhoranca po tenton ti mbyllë gojën opozitës në Kuvend.
“Nuk prisnim ndonjë surprizë. Vendimi i Byrosë ishte i parashikuar. Byroja është kthyer në plotësuese të tekave të PS, nëpërmjet mekanizmit të votës.
Morën vendim për të përjashtuar Edi Palokëm, por theksuam se në këtë mënyrë po e keqadministrojnë dhe po e kthejnë seancën parlamentare në një ambient për ti mbyllur gojën opozitës.
Paloka u dënua sepse kërkoi sqarime për moszbatimin e rregullores.
Kjo mënyrë gjykimi është anakronike. Dihet se edhe në raste të tjera të mëparshme, është vendosur në favor të grupit parlamentar ët PS-së.
I kërkova të heqin dorë, nga praktika të tilla që nëpërmjet 2 – 3 ministrave ti heqin opozitës të drejtën e fjalës në Kuvend”, u shpreh Spaho.