Harta e re elektorale, PS gjithçka për të fituar në 2017, “ju vjedh” në letra deputetë PD dhe LSI

PS po punon që të sigurojë rezultat pozitiv për zgjedhjet e 2017, duke “rregulluar letrat”.
Në funksion të kësaj, pas ndarjes territoriale, siç dëshiroi vetë, tani, po tenton rindarjen e mandateve për çdo qark, duke u kujdesur tu heq nga një mandat deputetet qarqeve që mbështesin PD dhe LSI.
Për këtë arsye, në zgjedhjet parlamentare të 2017-ës pritet të ketë një hartë të re elektorale, e cila do të përcaktojë edhe rishpërndarjen e mandateve. Tirana dhe Durrësi, sipas një propozimi të Komisionit të Reformës Zgjedhore do të kenë rritje të mandateve, ndërsa Kukësi, Korça e Berati do të përfaqësohen secili Qark me nga 1 deputet më pak në parlamentin e ri.
Lëvizjet demografike brenda territorit shqiptar si dhe lindjet natyrale do të përcaktojnë edhe ndarjen elektorale të re për zgjedhjet parlamentare të 2017. Bazuar në rezultatin e vitit 2013, pa pasur parasysh koalicionet, apo ndryshimin e votës së shqiptarëve, Komisioni i Reformës Zgjedhore mësohet të ketë nisur përllogaritjen e ndarjes së re elektorale, duke i paraprirë përgatitjes së procesit elektoral.
Ajo që bie në sy, është një propozim për një rishpërndarje të mandateve, të cilat prekin një numër të kufizuar qarqesh. Berati i cili sipas rezultatit të 2013 përfaqësohet në Parlament me 8 deputetë, sipas propozimit të ri do ketë një deputet më pak pas zgjedhjeve të vitit të ardhshëm.
Po kështu, sipas propozimit edhe Korçës i hiqet një mandat. Nga 12 deputetë, në Parlament do të jenë 11 të cilët do të përfaqësojnë këtë Qark. Gjithashtu është propozuar që edhe Kukësi të humbasë një mandat, nga 4 në 3 të tillë. Mandate të cilat propozohet të rishpërndahen në dy qarqet më të mëdha. Respektivisht Tirana fiton 2 mandate, duke bërë që numri i deputetëve në 2017 të rritet nga 32 në 34. Ndërkohë që dhe Durrësi përfiton një deputet më shumë.