Kryetari i Kuvendit, Ilir Meta, ka deklaruar se kjo është e bukura e demokracisë, ndërsa nuk e ka fshehur suprimimin nga fitorja e Donald Trump.
“Nuk është e rëndësishme se kush ndërrohet në Uashington apo në Tiranë, pasi të gjithë janë të detyruar dhe të obliguar t’i shërbejnë lulëzimit të marrëdhënieve shqiptaro-amerikane”, u shpreh midis të tjerave Ilir Meta, gjatë takimit të organizuar nga Ambasadori amerikan në Tiranë, Donald Lu.
Intervista e plotë e Ilir Metës
Meta: Ka qenë një proces i jashtëzakonshëm me dinamika të paparashikueshme. Solli një rezultat të paparashikueshëm për shumicën e mediave, sondazheve por ka qenë një finale mjaft demokratike, jo vetëm urimi i znj. Clinton por edhe vlerësimi që ka bërë z. Trump për rivalen e tij dhe kontributet e saj për SHBA. Pra, ka qenë një fushatë mjaft e fortë, mjaft e ndarë, por duhet thënë se Amerika ka dalë e bashkuar dhe z.Trump i ka të gjitha mundësitë të bëjë realitet dhe sloganin e znj. Clinton “Së bashku më të fortë.
A ishte demokratik procesi dhe deklarata e Trump pas procesit, a ishte e duhura?
Meta: Procesi ndoshta ishte edhe më demokratik se duhet, në kuptimin se gara ka qenë mjaft e fortë dhe ndonjëherë ndoshta etika nuk u ruajt në ato parametra etike që ne jemi mësuar në garat amerikane por fundi që mbahet mend ishte një fund i mrekullueshëm për sa i takon kulturës politike dhe demokratike dhe besoj se ky proces do ta ndihmojë dhe Amerikën të eci edhe më shpejt përpara.
Kur thatë se rezultati ka bënë shumë i papritur për shumë persona, a fusni këtu dhe veten tuaj?
Meta: Unë jam një natyrë që në përgjithësi jam skeptik ndaj sondazheve por edhe ndaj mediave në kuptimin e ndikimeve aq më tepër që dhe eksperienca të ndryshme na kanë bërë për të qenë gjithnjë skeptikë, por natyrisht që fitorja e znj. Clinton nuk do të ishte një surprizë pasi ka qenë një figurë shumë e njohur në SHBA dhe në gjithë botën. Surprizë ishte kjo që ndodhi që tregoi dhe njëherë se demokracia është e bukur se çdo gjë mund të ndodhë.
Po marrëdhëniet Shqipëri – SHBA me zgjedhjen në krye të shtetit, të Donald Trump? Mendoni se do të jenë siç kanë qenë tradicionalisht?
Meta: Mendoj se do të jenë edhe më të mira, sepse unë jam i bindur se marrëdhëniet midis dy vendeve dy shteteve janë mjaft solide, por në 16 vjet kur Presidenti Bush e hapi këtë marrëdhënie pas vetë hapjes që Shqipëria nisi, edhe të gjithë presidentët më pas e kanë konsoliduar këtë marrëdhënie. Kjo është një marrëdhënie shtetërore, strategjike. Nuk është e rëndësishme se kush ndërrohet në Uashington apo ën Tiranë, pasi të gjithë janë të detyruar dhe të obliguar t’i shërbejnë lulëzimit të marrëdhënieve shqiptaro-amerikane.
