Ish kryeministri Sali Berisha doli në një konferencë për median për të denoncuar atë që sipas tij e quan megaafera e Gjiknurit.
“Një tender në KESH mbahet në sekret të plotë, pa shpallje zyrtare. Kontrata e fshehtë mes KESH e kompanisë EFT.
Dua të denoncoj një mega-aferë të re të përmasave gjigande korruptive të realizuar me urdhër direkt të Edi Ramës nga hajduti me fytyrë njeriu Damian Gjiknuri. Me datë 30.06.2016, KESH, sipërmarrja që ka për drejtor një Agron Hetoja apo Hatoja hap tenderin me subjekt shprehje interesi për marrëveshjen në kuadër për depozitimin e energjisë elektrike.
Një tender i cili mbahet në sekret të plotë. Pa shpallje zyrtare, pa ftesë për kompani ndërkombëtare prezente në tregun energjitik shqiptar, por thjesht publikuan në arkvin e faqes së internetit të KESH.sha dhe në atë tender lind një kontratë monstruoze korruptive për llogari të Edi Ramës dhe hajdutit me fytyrë njeriu Damian Gjiknuri.
Kontratë midis KESH.sha dhe kompanisë EFT e njohur ndryshe si lugati i korrupsionit në rajon.Disa kompani ndërkombëtare prestigjioze pasi panë njoftimin në faqen e internetit nxituan të paraqesin ofertat e tyre por të gjitha çuditërisht nuk u afruan dot as në fazës e negociatave me KESH. Kjo një histori e paprecedent pasi procedura shprehje-interesi nënkupton fazën e negociatave me të gjitha kompanitë të cilat plotësojnë kushtet.Tenderi nuk u shpall nga Agjencia e Prokurorimeve. U vu vetëm një letër afishimi. Megjithatë kompanitë shkuan për të paraqitur ofertat e tyre, që të gjitha u hodhën poshtë pa negociata fare dhe mbeti vetëm një kompani fitimtarja”, eshte shprehur Berisha.
