Partia Demokratike, përmes zëdhënëses Ina Zhupa tha se kryeministri Rama po zmadhon gjithnjë e më shumë përmasat e aferës së stadiumit “Qemal Stafa”.
“Grykësia e Edi Ramës, me aferën e stadiumit Qemal Stafa, nuk ndalet. Pak ditë më parë, ai ka vendosur të shtojë edhe 2800 metra katrorë për biznesin e tij në zonën më të shtrenjtë e më të leverdishme të Tiranës. Edhe 2800 metra më shumë për qendrën gjigande të tregtisë, me dyqane, bare, restorante, dhoma e suita hoteli”, është shprehur Ina Zhupa.
Më tejn zëdhënësja ka treguar edhe vendimin e qeverisë, ku 2.800 metra katrorë pronë e bashkisë dhe qytetarëve të Tiranës, kalojnë për dyqane e hoteleri, “për aferën më të madhe financiare të kryeministrit”.
“2800 metra katrorë që bëhen përjetë pronë e klientit, pas të cilit fshihet në të vërtetë Edi Rama. Ja ku është vendimi i qeverisë, ku 2800 metra katrorë, pronë e bashkisë, e qytetarëve të Tiranës, kalojnë për dyqane e hoteleri, për aferën më të madhe financiare të Edi Ramës. Ndërsa mban te fshehte pikën kryesore të kontratës, dhe nuk bën transparencë si si i ka ndarë metrat, sa ka lënë për qytetarët, për sportin, e sa për qendrën e tij të madhe të biznesit, shkon edhe më larg e vendos të kafshojë edhe 2800 metra tokë në mes të Tiranës për interesat e tij financiare”,
Sipas PD kjo është një babëzi e pashoqe, të cilën, ashtu si gjithë këtë aferë korrupsioni, Partia Demokratike nuk e njeh, dhe do ta anullojë me marrjen e drejtimit të vendit.
“Edi Rama nuk do të bëhet pronar i përjetshëm i dhjetra mijë metrave katrorë në zemër të Tiranës.Prona do ti kthetet qytetarëve, dhe llogaritë e Ramës me miliona euro për metra katrorë do të bëhen nul. Do të ketë stadium ku prioritet ka sporti e spektatori, ku do të respektohen standartet më të larta olimpike. Shqipëria do të jetë më mirë pa Edi Ramën”, ka përfunduar Ina Zhupa.
