E gjithë Maqedonia sot është në zi në kujtim të viktimave të përmbytjeve katastrofike që kapluan Shkupin mbëmjen e së premtes. Flamujt janë ulur në gjysmështizë, ndërkohë autoritetet gjenden akoma në terren në kërkim të personave të zhdukur në rajonet e përfshira nga vërshimet.
Ekipet e MPB-së janë duke kontrolluar vendbanimet pas tërheqjes së ujit, ndërsa kërkimet sidomos janë përqëndruar në bodrumet e shtëpive të përmbytura.
Deri më tani nuk ka ndonja dalje të re për media nga ana e Ministrisë së Punëve të Brendshme, pra bilanci zyrtar i viktimave mbetet i njëjtë, 21 të vdekur.
Lagjja Çento, Smillkovca, Haraçina, Inxhikova dhe një pjesë e Ilindenit për shkaqe sigurie do të mbeten pa energji elektrike.
Një numër i madh i organizatave bamirëse të vendit si dhe një numër i madh biznesesh janë duke ndihmuar me produkte dhe gjëra tjera të nevojshme banorët e këryre zonave. Këto lagje njëkohësisht vizitohen edhe nga ambasdorë të vendeve të rajonit, të cilët nga afër po njihen me situatën e krijuar.
Gjendja më e rëndë vazhdon të mbetet në lagjen Hasanbeg. Banorët e kësaj ane nuk janë të kënaqur me ndihmat që iu ofrohen brenda këtij vendbanimi. Ata shprehen se iu ofrohet vetëm bukë dhe ujë, derisa nevojat e tyre janë shumë të mëdha dhe nga më të ndryshme. Ndërkohë që nevoja më e madhe për momentin është për veshmbathje.
Ndëkohë në seancën e fundit të jashtëzakonshme, qeveria e Maqedonisë mori vendimin për shpërndarjen e ndihmave financiare për familjet e viktimave që humbën jetën në përmbytjet. Për çdo familje që ka humbur të paktën një familjar do të ndahen nga 300 mijë denarë. Gjithashtu është marrë vendimin për shpalljen e gjendjes së krizës në rajonin e Shkupit dhe Tetovës në kohëzgjatje prej 15 ditëve.
Së shpejti pritet të formohet edhe një komision për vlerisimin e dëmeve.
Reshjet e shiut kanë qenë prezentë edhe gjatë mbrëmjes së djeshme mirëpo nuk ka pasur dëme. /ora news/
