Drejtoria Vendore e Policisë së Lezhës ka dhënë detaje për shoqërimin e autobusit me studentë të Malit të Zi.
Sipas burimeve zyrtare të kësaj policie, mësohet se rreth orës 11:00 të paradites së sotme, te Minimarket & Karburant “Kastrati” në Reps Mirditë, një autobus me 41 shtetas malazez, 1 shtetas rumun dhe 1 shtetas serb, janë ndalur dhe disa prej tyre kanë hyrë në minirmarket për të blerë artikuj ushqimorë dhe pije freskuese. Pasi kanë hyrë brenda ata kanë marrë artikujt që u nevojiteshin dhe janë larguar me vrap pa paguar.
Pas njoftimit të bërë, shërbimet e policisë janë vënë menjëherë në lëvizje duke bërë të mundur identifikimin dhe ndalimin e autobusit së bashku me të gjithë shtetasit të cilët u shoqëruan në Komisariatin e Policisë Lezhë.
Nga veprimet hetimore të deritanishme, 8 prej tyre janë proceduar në gjendje të lirë për veprën penale “Vjedhja” parashikuar nga neni 134 i Kodit Penal.
Vazhdojnë hetimet për sqarimin e plotë të situatës. Materialet do t’i referohen Prokurorisë së Rrethit Gjyqësor Lezhë për veprime të mëtejshme.
Për më shumë mund të lexoni edhe …
