Për herë të parë, që pas plasjes së skandalit të pajisjes së përgjimit, Edi Rama sot, “ka futur në thes” qeverinë italiane. Ndërsa, asnjëherë gjatë këtyre javëve, qeveria italiane nuk ka qenë pjesë e debateve për këtë skandal në Shqipëri, Edi Rama, “guxoi” sot ta “inkriminonte” atë, në pretendimin e të kërkuarit ndjesë për “çudinë-pezullimin” e kryepolicit shqiptar Haki Çako.
“Çka ka ndodhur sot me pezullimin e Drejtorit të Përgjithshëm të Policisë së Shtetit dhe ndalimin e dy drejtuesve të saj, më imponon t’i kërkoj ndjesë publikisht qeverisë mike dhe partnere të Italisë. Kjo ndodhi është e pajustifikueshme dhe për Shqipërinë është një tjetër kambanë që bie për emergjencën kombëtare të Reformës në Drejtësi”, shprehet në një deklaratë për shtyp, kryeministri shqiptar.
Duke ju referuar “rolit” të ambasadorit të Italisë në Shqipëri, Rama nuk përmend se ai ka qenë një “letërkëmbyes” midis autoriteteve ligjzbatuese shqiptare dhe italiane, por e vendos si “zëdhënës” të qeverisë italiane. Nga ana tjetër, Rama “harron” me dashje, se ambasadori Alberto Cutillo, si “qëndrim” të vetëm, të pretenduar prej qeverisë italiane, nuk ka deklaruar asgjë më shumë se “Nuk mund të komentoj në lidhje me këtë çështje në një kohë që është në zhvillim nga hetimet përkatëse”.
Përpos kësaj, Rama tenton “inkriminimin” e qeverisë italiane kur shprehet se, “Mbroj fort pikëpamjen se shpjegimet e dhëna nga Italia përmes ambasadorit italian, pa asnjë detyrim, por vetëm si shprehje e miqësisë së sinqertë dhe vullnetit më të mirë, për të vendosur nën dritën e fakteve legjendën politike të përgjimeve, duhet të kishin mjaftuar që institucioni shqiptar i akuzës të mos përfshihej në një makinacion kaq të rëndomtë politik. Por fatkeqësisht nuk ka ndodhur kështu dhe sot, miqtë e partnerët tanë të provuar në çdo ditë të vështirë të Shqipërisë së këtyre njëzetë e pesë vjetëve, kanë të drejtë të ndjehen të lënduar nga përfshirja e tyre indirekte në një hetim absurd si edhe, më zi akoma, nga veprimi ekstrem që ka ndërmarrë sot prokuroria”.
Ndoshta Edi Rama me “përfshirje të tyre indirekte”, nënkupton vendimin e sotëm të tërheqjes urgjent, nga Shqipëria të Michelle Grillo, kreut të Interforcës italiane.
… Dhe më tej, si për tu siguruar se “ndjesa” e tij “zuri vend”, Edi Rama e ripërsërit atë.
“Duke u kërkuar ndjesë për këtë ‘çudi’ që e ka dëmtuar jo pak vazhdën e një bashkëpunimi të shkëlqyer, prej të cilit në gjithë këto vite, Shqipëria e shqiptarët kanë përfituar aq shumë, sa kurrë nuk do të mund të lahemi me fqinjët tanë të mirë, dua t’i siguroj miqtë e mëdhenj dhe partnerët e paçmueshëm italianë për mirënjohjen më të thellë e konsideratën më të lartë”.
Por, veç qëllimit për të nxjerrë “të larë” qeverinë, ministrinë e Brendshme dhe Policinë shqiptare me këtë “ndjesë publike”, ajo duket e pasinqertë për aq kohë sa nuk ka informacion se nëpërmjet kanaleve diplomatike (ambasadorit italian në Tiranë), Edi Rama t’ia ka përcjellë këtë ndjesë, në gjuhën italiane, homologut të tij italian, Matteo Renzi… Është e pabesueshme të mendohet se Renzi kupton shqip, që të mund ta lexojë ndjesën në “origjinal” në web-in e kryeministrisë shqiptare, apo në “Facebook”-un e Edi Ramës…
PAJISJA E PËRGJIMIT/ Rama “inkriminon” qeverinë italiane, për të dekriminalizuar qeverinë shqiptare
