Duket se debatin më të madh e ka marrë arritja e një konsensusi për vendet e rezervuara në tre prej institucioneve të reja të drejtësisë, këshillin e Gjyqësorit, të Prokurorisë dhe ndoshta te Komsioni i Pavarur.
PD ka këmbëngulur në këtë version të përzgjedhjes së drejtuesve të disa institucioneve të drejtësisë duke iu referuar edhe draftit më të fundit të Venecias që u publikua në mars, sugjerimeve të OPDAT dhe EURALIUS, po ashtu.
PD sjell si argument shtesë edhe faktin se këtë variant e përdor Malta, Kroacia etj.
Drafti i fundit i diskutuar nga palët ishte i redaktuar nga ambasadorët Lu dhe Vlahutin. Sic theksoi sot në një koment Zëri i Amerikës “Ndonëse kishin mbështetur pa rezerva tekstin e rishikuar mbi bazën e rekomandimeve të Komsionit të Venecias, nga ana e ekspertëve të tyre të OPDAT-it dhe EURALIUS-it, javën e shkuar, në përpjekje për të afruar qëndrimet e palëve, ambasadori amerikan Donald Lu dhe ajo e delegacionit të Komisionit europian Romana Vlahutin, paraqitën një variant të ri, ku sugjerohej shkurtimi i dy institucioneve të reja të parashikuara fillimisht si dhe votimi me dy tretat, deri në zgjedhjet e ardhshme, për emërimet në institucionet e Drejtësisë”.
Duket se në atë draft nuk ishin përfshirë mënyra e përzgjedhjes së drejtuesve të disa institucioneve të reja duke ia lënë ën dorë takimit apo takimeve të pritshme në lidhje em reformën.
Rama deklaroi pas takimit se drafti do të shkojë në parlament. Deklarata e Mogherinit, që i kushtohet rastit kur konsensus nuk ka, në të cilën thuhet se votimi është përgjegjësi individuale e cdo deputeti, mund të mos funksionojë nëse opozita vendos të bojkotojë Parlamentin ditën e votimit të draftit. Basha e bëri të qartë se opozita nuk do të votojë një refromë pa konsensus dhe se këmbëngulja e PD për vendet e rezervuara lidhet me shmangien e kapjes së drejtësisë nga politika.
Mungesa e konsensusit për drejtësinë ka lënë në hije edhe tema të tjera që lidheshin me refromën zgjedhore.
