Shefi i opozitës, Lulzim Basha deklaroi fill pas takimit se mazhoranca nuk ia bashkua konsensusit për të vetmen pikë që na ndan në këtë reformë, modeli i vendeve të rezervuara, një model i ofruar nga Venecia dhe ekspertët ndërkombëtarë.
“Erdha sot në këtë takim me përfaqësuesit më të lartë të mazhorancës me vullnetin për të kërkuar dhe ofruar zgjidhje, zgjidhje për drejtësi që lufton dhe nuk mbron korrupsionin. Ne kemi pasur një kusht: Moskapjen politike të drejtësisë. Kapja e drejtësisë është korrupsion i korrupsionit. Korrupsioni në drejtësi është pasojë e korrupsionit politik.
Drejtësia shantazhohet nga një korrupsion politik, nga oligarkët që bëjnë rrush e kumbulla paratë e taksapaguesve shqiptarë.
Në shtator të vitit të kaluar PS dërgoi në Venecia një draft që parashikonte kapjen totale të drejtësisë prej qeverisë duke nisur nga Byroja Kombëtare e Hetimit. Falë kontributeve tona Venecia cmontoi këtë draft duke i dhënë të drejtë opozitës.
Një draft i dytë i njëanshëm u dërgua në Venecia dhe për herë të dytë nga Venecia erdhën ndryshimet për shkak të këmbënguljes së opozitës.
Ka dy muaj që mazhoranca refuzon të përmirësojë arkitekturën e sistemit të drejtësisë. Kjo coi në një draft të tretë të ndërkombëtarëve.
Ne kemi pranuar arkitekturën e rezervuar të sistemit të drejtësisë të mbështetur nga OPDAT dhe EURALIUS dhe Venecia po ashtu. Rama ka thënë se është PD që nuk e do reformën në drejtësi. Ne argumentuam rreth vendeve të rezervuara si pika e vetme që na ndan, është një praktikë evropiane. Ata nuk pranuan. Është mungesë vullneti e mazhorancës për reformën në drejtësi. Nuk është kapricio por ofertë e Venecias, modeli i vendeve të rezervuara”, tha ndër të tjera Basha.
Ne nuk erdhëm për lojë , tha ai, por për rregulla të lojës. Mazhoranca nuk ka argumente për këtë mungesë rrugëdalje, tha ai.
Basha tha se cdo akt unilateral pa opozitën i paketës së reformës në Parlament do të ndëshkohet.
