Moderatori i njohur i Vizion Plus, Turjan Hyska, prej kohësh e ka gjetur veten pranë programit “Oktapod”, një format i ideuar dhe realizuar nga vetë ai me të ftuar personazhe të njohur nga fusha të ndryshme të jetës. Por brenda të njëjtit emër të programit, Turi së shpejti do të publikojë një projekt të ri që i përket muzikës, dashurisë së tij të parë. “Oktapod” është emri i projektit të parë dhe të fundit solo të Turit, i cili do të përmbajë gjithsej 8 këngë, realizimi i të cilave ka mbaruar vitin e kaluar. Të gjitha të ardhurat që do të vijnë nga klikimet e këtyre këngëve do të shkojnë për bamirësi, rrëfen Turi, në një intervistë për “Panorama”.
Por përtej karrierës artistike, moderatori i njohur prej vitesh bashkëjeton me këngëtaren dhe moderatoren e të njëjtit ekran, Orinda Huta, e cila, së fundi është angazhuar edhe më shumë si prezantuese e programit të pasdites në Vizion Plus. Për këtë, Turi tregon se nuk ka ndërhyrë fare (kam konflikt interesi), por tregon se diҫka e ka ҫuditur tek partnerja e tij: “Si prezantuese nuk është se kisha shumë merak a do t’ia dilte, por ajo që më ka ҫuditur (dhe pse ndoshta nuk besohet) është energjia, pasioni dhe koha shumë e madhe që Orinda i kushton atij programi. E do vërtet shumë dhe besoj ia ka dalë me sukses ta justifikojë pozicionin dhe peshën e tij”, – tregon Turi.
Marrëdhënia e gjatë e ҫiftit, ende nuk ka një plan konkret kurorëzimi në martesë. Mediat kanë tentuar të shkruajnë lajmin se ky do të jetë viti i martesës për Orindën dhe Turin, por ky i fundit, me sa duket, nuk di gjë akoma: “Pyesni Orindën, unë gati jam” – thotë ai.
