Seksioni për Korrupsionin pranë Drejtorisë Vendore së Policisë Tiranë ka bërë sot ndalimin e një shtetaseje ndërsa tentonte të largohej nga Shqipëria nëpërmjet Aeroportit të Rinasit. Po ashtu, mësohet se është shpallur në kërkim një shtetas tjetër, për veprën penale “Shpërdorimi i detyrës” kryer në bashkëpunim dhe “Korrupsioni pasiv në sektorin privat”.
Sipas burimeve të Policisë Vendore, mësohet se e ndaluara është Majlinda Tafaj, 40 vjeçe, banuese në Tiranë, me profesion sekretare pranë Fakultetit të Shkencave Sociale Tiranë.
Ndalimi i kësaj është bërë pasi në datë 10. 05. 2016 në emisionin investigativ “Stop” në TV Klan janë transmetuar pamje filmike (audio-video) të regjistruar në ambientet e qendrës ”International Studies Insitute” në Tiranë ku një shtetase që nuk ka fare njohuri në gjuhën Angleze, nëpërmjet ndihmës së asistenteve dhe pedagogëve kundrejt pagesës, realizon testin dhe në fund siguron certifikatën e njohjes së gjuhës Angleze që përdoret si kriter pranimi në programet e studimit të ciklit të dytë dhe të tretë në institucionet për arsimin e lartë.
Të njëjta burime saktësojnë se rezulton, se personat e përfshirë në veprime të jashtëligjshme, korruptive janë L. M., me detyrë administrator i qendrës “Esol Examinations “BULATS” dhe Majlinda Tafaj me detyrë sekretare mësimore në Fakultetin e Shkencave Sociale Tiranë.
Sipas policisë mësohet gjithashtu se më datë 12. 05. 2016 Majlinda Tafaj është kapur në flagrancë në Pikën e Kalimit Kufitar Rinas në përpjekje për tu larguar jashtë vendit dhe ka vetdeklaruar se ka bashkëpunuar me shtetasi L. M. dhe ka marrë prej tij vlera monetare (Euro) si shpërblim, përfitim personal për studentë që i ka rekomanduar dhe janë pajisur me certifikatë të “Esol Examinations BULATS”.
Po punohet për identifikimin e bashkëpunëtorëve të tjerë të përfshirë në këtë veprimtari kriminale.
Materialet procedurale janë referuar në Prokurorinë e Rrethit Gjyqësor Tiranë për veprat penale “Shpërdorimi i detyrës” kryer në bashkëpunim dhe “Korrupsioni pasiv në sektorin privat” parashikuar nga nenit 248-25 dhe 164/b të Kodit Penal.
Tiranë, arrestohet sekretarja e Shkencave Sociale, tentonte të arratisej nga Aeroporti i Rinasit
