Me premtimin se do i dërgonin në Kanada për të jetuar dhe se do fillonin punë, qindra shqiptarë janë gënjyer nga agjensia Ande-LM, firmë kjo e cila u ka marrë miliona lekë qytetarëve të gënjyer.
Një nga viktimat e kësaj agjensie ka denoncuar pranë Jetaoshqef.al mashtrimin që i është bërë asaj dhe shumë të tjerëve. Administratorja e kësaj agjensie, Lule Makashi, ka marrë arratinë bashkë me milionat e lekëve të mbledhura nga pothuajse 2 mijë aplikantë.Lule Makashi është gruaja e ish-drejtorit të policisë së Durrësit, Edmond Makashi , që i dha fund jetës përmes vetëvrasjes.
Rreth 30 persona kanë denoncuar mashtrimin në Drejtorinë e Policisë së Tiranës pasi kanë kaluar më shumë se dy vjet që nga koha e aplikimit dhe e kryerjes së pagesës dhe nuk kanë marrë atë që prisnin, emigrimin në Kanada.
Sot Policia e Tiranës bëri me dije se ka arrestuar shtetasit Klevis Rreshka, 25 vjeç, banues në Tiranë dhe ka shpallur në kërkim Lule Makashin, 51-vjeçe dhe Adeila Makashin, 28 vjeçe, të dyja këto të fundit banuese në Tiranë.
Vajza që ka kontaktuar me ne shprehet se ka folur me një nga avokatët kanadezë, i quajtur Kieran Verboven, duke e pyetur për rastin në fjalë, por ai ka mohuar që të jetë bërë ndonjë pagesë në emër të saj. Sipas saj, Lule Makashi është administratore, sepse pronar i kësaj firme është një politikan me karrierë të gjatë në politikën shqiptare.
Sigurisht, bashkë me denoncimin vajza ka dërguar një sërë provash që janë dëshmi e një skeme mashtrimi që u është bërë këtyre qytetarëve të cilët kanë shpresuar për një jetë tjetër në Kanada.
Gjithashtu, përveç dëmit financiar, ajo ka pësuar edhe një dëm psikologjik duke pasur parasysh se ka ndërprerë shkollën dhe ka lënë 3 herë punën duke shpresuar se do të nisej për Kanada nga dita në ditë.
