Deputetja socialiste e Shkodrës Mimoza Hafizi, në përfundim të mbledhjes së grupit parlamentar të PS tha se ka ngritur si problem në mbledhjen e grupit të PS-së situatën e krijuar me zgjedhjet në universitete.
Hafizi tha se ka kërkuar informacion mbi lajmin e kërcënimit të akademikëve, si dhe ka kërkuar nga Qeveria të siguroj mbarëvajtjen e këtij procesi.
“Nuk ka ndodhur ndonjëherë në historinë e arsimit në Shqipëri, që banditizmi të afrohet kaq shumë me universitetin. Nëse ngjarja është e vërtetë, atëherë është e rëndë. Kërkova informacion për lajmin e kërcënimit të akademikëve. Na u tha se qeveria ka marrëdhënie të mirë me kandidatët, dhe prokuroria po heton. Kërkova të di se çfarë po ndodh në qeveri për të garantuar zgjedhje të lira në universitete. Përgjigjja ishte se Qeveria dhe MAS ka marrë të gjitha masat për një ecuri normale të procesit të zgjedhjeve në universitet dhe për të garantuar autonominë e tyre”, tha deputetja Hafizi.
