Filozofi Artan Fuga ka kritikuar sot festimet e djeshme të Ditës së Verës në disa nga qytetet kryesore të vendit. Sipas tij festa zyrtare është një përzierje e paganizmit dhe propogandës.
“Festimi i Ditës të Verës në Tiranë dje më trishtoi dhe më la pa mend.
Kombi quan festa zyrtare dhe jep ditë pushimi për festat pagane!!!
A thua se feston hënën, a tërheqjen e Tokës nga planetet e tjera, a feston ligjin e gravitacionit, se çfarë thoshte dikush dje në një gazetë.
O Zot shpëtona nga paganizmi si ideologji elektorale dhe strategji për të ndërtuar imazh personal me festa pagane.
Vetëm Perandori August romak i lejonte vetes ta bënte këtë.
Po i kthehemi paganizimit tani.
Nuk ka gjë të keqe kur njerëzit i festojnë në mënyrë spontane, privatisht, pa u menduar gjatë, si forcë zakoni. Kështu cdo festë popullore është e bekuar.
Por bashkimi i paganizmit, me progandën masive se gjoja jemi solidarë dhe paqësorë me njeri tjetrin, se presim të lumtur pranverën kur përzemë zogjtë dhe presim pemët e betonojmë, kur as diell as hënë nuk shohim më nga dritarja e shtëpisë, bashkuar edhe me burokratizmin e drejtimit të festës nga një burokraci lokale që përvetëson tashmë jo vetem parqet, ajrin, diellin, por edhe festat pagane,
ky është një tmerr, dhe ferr, përzjerja në një poçe e paganizmit, propagandës masive, nxjerrjes të turmave nëpër rrugë me lloj lloj marifetesh, dhe e burokracisë aspak demokratike, nuk jep veçse shije të keqe, banalitet, vulgaritet dhe na bën të emigrojmë në një emigrim të brendshëm, duke braktisur rrugët, mediat, politikën, e duke u zhytyr në olimpet tona personale”.
