Basha: Ndryshimet në qeveri arnime korruptive që përfaqësojnë interesat e Ramës

Kreu i PD-së ka reaguar për ndryshimet e sotme në qeveri.
Sipas Lulzim Bashës, kryeministri Edi Rama mbetet i vendosur në promovimin e vjedhjes dhe hajdutërisë.
“Edhe pse lufta ndaj korrupsionit është një prioritet absolut siç e vuri në dukje edhe Sekretari amerikan i Shtetit, Edi Rama mbetet i vendosur në promovimin e vjedhjes dhe hajdutërisë. Pasi bëri kurban Shkëlqim Canin për të mbuluar vjedhjen e 400 milionë dollarëve në tatime dhe dogana, me caktimin e Arben Ahmetajt si ministër financash, Rama konfirmoi se plaçkitja, zhvatja, mbushja e xhepave me paratë e shqiptarëve, janë standardet e tij të qeverisjes. Ahmetaj është ndër më të besuarit e bandës plaçkitëse të Edi Ramës. Ai ka feksur me landfillin e Elbasanit nga ku vidhen 10 mijë euro para publike në ditë, dhe ka shkëlqyer si ndërmjetësi i pazarit të fshehtë, të paligjshëm dhe korruptiv për mega-aferën Skavica”.
Për bashin, këto ndryshime janë mesazh i qartë i kryemsitrit Rama, sipas të cilit “vidh që të bëhesh deputet e ministër” dhe se këto ndryshime janë arnime korruptive që pasqyrojnë vetëm interesat e kryeministrit.
“Rama dekoroi sot dhe modelin e koncesioneve korruptive në shëndetësi, një prej vjedhjeve më të mëdha në historinë e vendit ku u ndanë mbi 338 milionë euro me miqtë dhe klientët e tij. Si zv.ministre e Shëndetësisë zonja Eonomi ka qenë një punëtore e palodhur në këtë skemë të madhe zhvatje. Për këtë kontribut ajo shpërblehet nga Rama duke u emëruar Ministre e Ekonomisë. Mesazhi i Ramës është i qartë. Vidh, bëhesh deputet dhe ministër. Vidh më shumë, Edi Rama të beson financat, të beson ekonominë e vendit. Këto arnime korruptive pasqyrojnë vetëm interesat financiare të Edi Ramës. Ato do ta thellojnë edhe më tej rekordin e vjedhjes, varfërinë dhe krizën që janë produktet e vetme të kësaj qeverie. Ndryshimi i vërtetë nis me largimin e Edi Ramës dhe bandës së tij plaçkitëse”, përfundon reagimi i Lulzim Bashës.