Një 40 vjeçar është arrestuar këtë herë nga Policia e Lezhës, pasi në mënyrë të përsëritur ka kërcënuar me vrasje një vajzë të mitur në këtë qytet, nëse ajo nuk do të vidhte lekë në shtëpi dhe t’ja jepte atij.
Në pranga ka rënë shtetasi Arben Uka, 40-vjeç, banues në Lezhë. 40 vjecari ka kërcënuar me vrasje minorenen A.M. 10 vjeç, për ti vjedhur lekët tek banesa e saj dhe për t’ja dhënë shtetasit Arben Uka. Vajza minorene, nën presionin e frikës, i ka vjedhur lekët babait dhe ia ka dhënë këtij shtetasi. Ky veprim është përsëritur disa herë,- thuhet në njoftimin zyrtar të Polcisë.
Vajza ka vjedhur nga banesa 10-20 mijë lekë të vjetra e më pas, e ndodhur në kushte presioni i ka treguar të atit i cili ka bërë kallëzim në polici. Uka akuzohet për veprat penale “Shtytja e të miturit në krim” dhe “Shtrëngimi me anë të kanosjes ose dhunës për dhënien e pasurisë”, parashikuar nga nenet 129 e 109/b të Kodit Penal. Materialet proçeduriale u referuan Prokurorisë pranë Gjykatës së Shkallës së Parë Lezhë për veprime të mëtejshme.
