Deputetja Mimoza Hafizi mbështet hapur Ben Blushin

Deputetja e PS Mimoza Hafizi, ka shprehur hapur mbështetjen e saj ndaj Ben Blushit.
Duke ju bashkuar Blushit, ajo kërkon respektimin e Statutit të partisë.
“Miq të nderuar! I bashkohem kolegut tim Ben BLUSHI në kërkesën për respektimin dhe zbatimin e statutit të Partisë Socialiste e normave themelore të qenies bashkë në këtë grupim të madh politik. I kam ofruar mbështetje në rrugëtimin dhe platformën për Kongresin e ardhshëm të Partisë”, shprehet në “Facebook”, deputetja e Shkodrës.
Ajo fton të gjithë ti përcjellin sugjerime, ndërsa paralajmëron se do të përcjellë aspiratat për të ardhmen e partisë, falë edhe përvojës së saj disa vjeçare në strukturat e PS.
“Do mundohem të përcjell në këtë dokument dhe në aspiratat tona për të ardhmen e partisë ku bëjmë pjesë, të gjithë përvojën e punës sime shumëvjeçare me strukturat socialiste të Tiranës e Shkodrës, zërin kritik të socialistëve shkodranë, analizat e përgjegjshmërisë qeverisëse deri në nivel bazë dhe reflektimet për një frymë të re bashkëpunimi e respekti. Mirëpres çdo sugjerim, besoj që kauza e një partie të madhe nuk i përket vetëm anëtarëve të saj, por çdo qytetari”, përfundon qëndrimin e saj Mimoza Hafizi.