Kreu i PD-së e ka cilësuar “Propagandë mashtruese dhe asgjë më shumë projektin e kamerave të trupit, apo kamerave të tjera që ka ndërmend të instalojë kjo klike e lidhur me bandat”.
Duke marrë shkas nga prezantimi i sotëm i këtij projekti, Basha ka vënë në dyshim se “Çdo teknologji që shton sigurinë e lufton krimin është e mirëpritur, por e gjitha mund të shkojë në të kundërtën, kur bie në duart e gabuara”.
Dyshimin e tij e ka shprehur më tej me disa pyetje, për kontrollin e pamjeve dhe analizën e tyre.
“Kush do ti shohë kamerat kur Ministri i Brendshëm takohet dhe ndërmjetëson me vrasësin me pagesë në zyrën e tij dhe në vilat qeveritare ne plazh?
Çfarë do të bëjë Saimir Tahiri me këto pamje, që ai vetë i regjistron?
Kush do ti shohë e kontrollojë kamerat kur Saimir Tahiri, apo dhe shefi i tij, takohen e rakordohen me makinë me bandat dhe banditet?
A do të funksionojnë kamerat kur Emiliano Shullazi të futet në doganë me makinë të blinduar, pa lënë gjurmë e nishan?
A do të ketë kamera kur ngrihet trau i doganës për miqtë e Edi Ramës, që kalojnë naftë e cigare kontrabandë?”, adreson një sërë pyetjesh kreu i PD-së.
“Sigurisht, ky nuk ka këtë plan. Kamerat e tij, thjesht s’do të punojnë, ose do të jenë me defekt teknik, kur vjen puna për të pasqyruar lidhjet e tmerrshme që ai ka me krimin”, përfundon Basha.
Reagimi i Lulzim Bashës erdhi pas prezantimit të projektit për pajisjen e efektivëve të Policisë me kamera trupi.
Kreu i qeverisë, Edi Rama e ka cilësuar projektin për kamerat në trupat e efektivë të policisë një revolucion teknologjik që do pasohet nga të tjerë për të bërë policinë shqiptare shembullore dhe pa asnjë dallim nga ato të vendeve të BE.
Basha: Kamerat e trupit propagandë mashtruese e dyshes Rama – Tahiri
