Kryeministri Edi Rama ka paralajmëruar nën zë Ben Blushin se mund të përjashtohet nga partia. Ai ka thënë gjatë një interviste me Ilir Babaramon në emisionin e tij “5 pyetje..” se ka një vijë të kuqe në PS.
Pyetje: Duke qëndruar tek deklaratat agresive të Blushit.. ai shpalli edhe kandidaturën e tij…
Përgjigje: Unë dua të ndaj qartësisht komentet sepse nuk komentoj komentatorët e atyre që bëjnë mirë ose keq, nga fakti. Fakti është që ne kemi një parti të organizuar mbi bazën laburiste të laburistëve të rinj që zgjedhin një anëtar një votë, liderin e partisë dhe që konsideron konfirmim të mandatit në zgjedhjet e përgjithshme pasi lideri i partisë është edhe kryeministri ku partia fiton zgjedhjet. Ky debat do vlente nëse partia ka humbur zgjedhjet. Kongresi i PS, do të marrë vendimin përkatës dhe kjo është e përcaktuar që nga Asambleja. Unë nuk kam as dëshirën as ngenë të hy në një debat të kësaj natyre pasi është fare e qartë që unë jam zgjedhur nga shqiptarët për të punuar ditë natë, për të realizuar programin tonë për rilindjen. E kam konsideruar dhe e konsideroj këtë një çështje që nuk ekziston. Secili ka legjitimitetin të shoh ndryshe.
Pyetje: A e ndjeni që duhet të rikonfirmoheni nga strukturat e PS?
Përgjigje: Ju siguroj që nuk më mungon absolutisht ndonjë rikonfirmim pasi kemi fituar dy palë zgjedhje njëra pas tjetrës dhe e kam parë pa lidhje që ne ti angazhojmë forcat në një fushatë brenda partisë pas fitimit të zgjedhjeve kur duhet të merreshim me hemoragjinë e vendit. Modeli është ky. Njerëzit na votuan që të qeverisim dhe ne nuk mund t’i thoshim prisni se ne kemi ca zgjedhje të tjera brenda partisë. Cameron u zgjodh kryeministër e nuk di të ketë bërë dhe nuk ka për të bërë zgjedhje për kryetar partie. Ashtu si Tony Bler u zgjodh 3 herë kryeministër dhe nuk bëri asnjëherë zgjedhje.
Pyetje: E shikoni si rival brenda PS?
Përgjigje: Jo
Pyetje: Përse nuk përjashtohet Blushi nga PS?
Përgjigje: Dihet qartë se kur nuk mund të jesh më pjesë e projektit të saj politik.
Pyetje: E ka kaluar vijën e kuqe ?
Përgjigje: Nuk më rezulton.
