Pavarësisht se Gjykata Kushtetuese ka rrëzuar ligjin për e ri për Tatimet, tatimorët do të nisin që sot kontrollet tek biznesi.
Zv.drejtori i përgjithshëm i Tatimeve, Flobenc Dilaveri i tha ora news se vizitat tatimore nuk pengohen nga vendimi i Gjykatës Kushtetuese për pezullimin e ligjit të procedurave tatimore, që parashikonte ndër të tjera vetë-deklarimin e mallrave pa faturë deri në 31 dhjetor.
Në rast të konstatimit të mallrave pa faturë, do të bëhet konfiskimi i tyre sipas ligjit të vjetër.
“Ne do të bëjmë vizitat fiskale te bizneset, me qëllim që bilancet e 2016-ës të fillojnë me gjendje sa më reale të inventarëve. Pasi kjo e bën më të monitorueshme situatën në vijim, por është edhe në avantazh të biznesit, pasi e ka më të lehtë të marrë faturat tatimore”, deklaroi zyrtari i lartë i Tatimeve.
Ai the se nëse bizneset kanë mospërputhje të inventarëve me gjendjen e mallit, atëherë do të zbatohen penalitete në bazë të ligjit të vjetër, që konsistojnë në konfiskimin e mallit pa faturë.
“Në rast se ka mospërputhje, atëherë do të bëhet rivlerësimi tatimor dhe mallrat pa faturë do të konfiskohen, sipas ligjit të vjetër”, deklaroi Dilaveri.
