Mbrëmjen e përleshjes në Lac ngjarja ka ndodhur në oborrin e komisariatit, megjithëse ka të dhëna se një pjesë e saj është zhvilluar edhe në ambientet brenda tij por kamerat janë fikur ose materiali i regjistruar është dëmtuar më pas.
Me të mbërritur në Komisariatin e Policisë Kurbin, Gjok Cali ka hyrë brenda ambjenteve të tij për të bërë kallëzim penal, ndërsa shtetasit që e shoqëronin Tom Cali, Nikoll Cali, Gjergj Cali dhe Francesk Cali kanë qëndruar në pritje të tij, jashtë ambjenteve te këtij Komisariati.
Në këto momente, para Komisariatit të Policise ka mbërritur deputeti i PS, Armando Prenga, i shoqëruar nga vëllai i tij Edmond Prenga, shtetasi Gazmir Jushi dhe disa persona të tjerë. Personi nën hetim Armando Prenga mbante në dorë një pistoletë dhe menjëherë ju është drejtuar shtetasve Tom Cali, Nikoll Cali, Gjergj Cali dhe Francesk Cali duke ju thënë: “Do t’ju qisim faret si fis”.
Pas këtij momenti dy grupet kanë filluar të konfliktohen fizikisht me njëri tjetrin. Sipas deklarimeve të personave të pranishëm në vendngjarje, personi nën hetim Armando Prenga ka shtënë disa herë me një armë zjarri të tipit pistoletë. Në vendngjarje rezulton se është qëlluar dhe me armë zjarri automatikë.
Nga të shtënat me armë zjarri në vendngjarje, kanë pësuar dëmtime në këmbë shtetasit Tom Cali dhe Nikoll Cali. Sipas Aktit të Ekspertimit mjeko-ligjor, datë 09.09.2015 shtetasi Tom Cali ka një plagë me armë zjarri, depërtuese në kërcirin e djathtë, e konsideruar nga akti ekspertimit si plagosje e lehtë. Sipas Akt Ekspertimit mjeko-ligjor datë 09.09.2015, shtetasi Nikoll Cali ka një plagë me armë zjarri tejshpuese në kërcirin e djathtë, e konsideruar nga akti ekspertimit si plagosje e lehtë.
