Rama: Flas nga përvoja ime…, pa gratë nuk do të kisha arsye për të jetuar

Kryeministri Edi Rama ka vlerësuar si arritje të rëndësishme praninë e dobishme të femrave në politikë, administratë dhe jetën ekonomike të vendit. Gjatë tryezës me temë “Gratë Shqiptare në rrugën drejt politikës dhe vendimmarrjes” me fokus gratë në pushtetin vendor, organizuar nga Aleanca Gjinore, Rama tha se është domosdoshmëri për të kuptuar vlerën e barazisë gjinore.
Sipas tij, ka nisur tashmë të ndihet një konkurrencë reale mes tyre dhe gjinisë tjetër.
Referuar edhe përvojës së tij Rama u shpreh se, “pa gratë, shumë burra, përfshirë edhe mua nuk do kishin arsye për të jetuar”.
Kryeministri Edi Rama deklaroi sot se shkalla e qytetërimit të një shoqërie lidhet me barazinë gjinore.
Teksa u ndal tek roli i gruas shqiptare në vendimmarrje, kreu i Ekzekutivit pohoi se ka ende punë për t’u bërë në këtë drejtim.
Rama ka veçuar se “burrat kanë aftësinë për të thënë gjërat kur justifikohen pse nuk i bëjnë, kurse gratë për aftësinë për të bërë gjërat dhe diferencë të madhe me burrat kur është fjala për t’u justifikuar, pra justifikohen shumë më pak dhe bëjnë shumë më shumë”.
Kryeministri Edi Rama nuk ka lënë pa thumbuar me tallje inspektorët e tatimeve, që sipas tij ikën me leje lindjeje nga frika e përballjes me korrupsionin që kishin bërë.
“Ne ligjet i kemi, tani kemi ligjin që u jep të drejtën burrave të marrin edhe leje lindje dhe në fakt shumë burra nga Tatimet ikën me leje lindje, e morëm për t’iu shmangur përballjes me vetveten, pasi për shumë inspektorë ishte e vështirë të kërkonin llogari te bizneset e vogla që ishin bërë pjesë korruptive për një kohë të gjatë duke mos i pasuruar si pjesë të regjistrit”, tha Rama.