Policia e Korçës ka nisur procedim penal ndaj tre mjekëve të spitalit rajonal pas një denoncimi që është bërë në emisionin “fiks fare” në Top Channel. Ndaj tyre rëndon akuza e shpërdorimit të detyrës dhe korrupsionit pasiv të personave që ushtrojnë funksione publike ndërkohë që drejtoria e spitalit i ka pezulluar nga puna.
Të proceduar janë K. SH, 43 vjeç shef i urgjencës, R. Ç, 45 vjeç mjek kirurg dhe V. Ç, 68 vjeç gjithashtu mjek kirurg në spitalin e Korçës.
Një qytetare kishte denoncuar rastin në emisionin investigativ “Fiks Fare” ku mjekët i kanë marrë për një operacion kirurgjikal të theshtë shumën prej 20 mijë lekësh të reja.
Shefi i urgjencës i premton këtë operacion dhe i thotë se ka biseduar me kirurgun dhe operacioni do të kryhet kundrejt një tarife shërbimi prej 200 mijë lekësh.
“Para pak kohësh biseduam me një mjek dhe na tha se operacioni shkon deri në 200 mijë lekë. Unë nuk mundem t’i gjej këto para dhe bashkëshorti nuk mund ta kryejë këtë operacion. Burri vuan nga dhjami dhe unë e kam të pamundur ta dërgoj atje pasi jemi familje e varfër”, shprehet bashkëshortja e personit me probleme shëndetësore, në regjistrimin e publikuar.
Zonja i është drejtuar emisionit “Fiks Fare”, ku shprehet se nëse nuk do të ketë një zgjidhje për këtë rast atëherë bashkëshorti i saj rrezikon jetën nga ky problem.
